Saılaýshylar Májilis pen máslıhat depýtattaryn saılaýda daýys berý úshin eń aldymen óziniń saılaý ýchaskesin anyqtaýy qajet. Ádette tizim azamattardyń turǵylyqty jeri boıynsha jasalady. О́zińniń qaı saılaý ýchaskesine tirkelgenińdi bilý ońaı. Jaqynda Nur-Sultan men Almaty qalalarynyń ákimdigi turǵyndarǵa saılaý ýchaskelerin anyqtaýdyń birneshe joly bar ekenin habarlady.
Saılaý ýchaskesi týraly málimetti birneshe tásilmen alýǵa bolatynyn sıfrlandyrý jónindegi jumys tobynyń jetekshisi, «Astana Innovations» AQ basqarma tóraǵasynyń orynbasary Asqar Taksımov aıtyp berdi. Eń aldymen, qala ákimdiginiń astana.gov.kz saıtynda qaı ýchaskege tirkelgenińdi ońaı bilýge bolady. Bas bettegi «О́z saılaý ýchaskeńdi tap» bannerin basyp, JSN engizý arqyly saılaý ýchaskesiniń nómirin, ortalyǵy men mekenjaıyn bilýge bolady eken. Odan bólek 109 nómiri arqyly iKomek biryńǵaı baılanys ortalyǵyna habarlasyp bilýge bolady. iKomek-tiń áleýmettik jelidegi paraqshalaryna da habarlasý múmkindigi bar. Saılaýshylar Smart Astana mobıldi qosymshasy arqyly da kerek aqparatty ala alady. О́zińniń saılaý ýchaskeńdi @smartastana_bot Telegram chat-boty arqyly da bilýge bolady eken.
«JSN, tegi, aty, ákesiniń aty jáne týǵan kúni nemese saılaýshy tirkelgen obektiniń (kóshe, úı) mekenjaıyn kórsetý arqyly saılaý ýchaskesi týraly onlaın rejimde aqparat alýǵa múmkindik bar. Bul qyzmet ýchaskeniń nómiri, mekenjaıy, baılanys telefondaryn kórsetip beredi. Ázirge saılaý ýchaskelerindegi telefon nómirleri bekitilgen joq, olar daıyn bolǵannan keıin qosylady. Sondaı-aq saılaý ýchaskesiniń ornalasqan jerin kartadan kórsetedi», dedi A.Taksımov.
Sonymen qatar saılaý ýchaskelerine jaqyn ornalasqan aıaldamalar men qyzmet kórsetetin marshrýttardyń nómirleri týraly aqparat jaqynda qoljetimdi bolady eken.
Týra osy sekildi Almaty turǵyndary da qaı saılaý ýchaskesine tirkelgenin ońaı anyqtaı alady. Saılaýshylar úshin ashylǵan service.almaty.kz saıtynda JSN engizý arqyly jyldam óziń daýys beretin ýchaskeni taýyp alasyń. Bolmasa Telegram áleýmettik jelisinde qosylǵan arnaıy @sailau_almaty botyn qoldanýǵa bolady. Almaty qalasynyń ákimdigi sondaı-aq shahar saılaýshylaryna arnap baılanys ortalyǵyn iske qosqan. Biryńǵaı 221-10-01 nómirine habarlasyp, saılaý ýchaskesine jáne saılaýǵa, daýys berý kúnine qatysty kez kelgen suraqqa jaýap alýǵa bolady. Baılanys ortalyǵy kún saıyn saǵat 8.00-den 20.00-ge deıin jumys isteıdi.
Azamattyń naqty bir saılaý ýchaskesinde saılaýshylar tizimine enýi onyń sol aýmaqta turǵylyqty jeri boıynsha turaqty tirkeýde turýyna baılanysty ekeni belgili. Al turaqty tirkeýsiz daýys berýdiń eki joly bar.
Saılaýshy bir aı buryn, ıaǵnı 10 jeltoqsanǵa deıin ózi daýys bergisi keletin aýdandyq ákimdikke jazbasha ótinish bildirýi kerek. О́tinishte saılaý ýchaskesiniń nómiri kórsetilýi kerek. Osy qujat negizinde aýdandyq ákimdik saılaýshyny ózi qalaǵan ýchaskeniń tizimine engizip, tirkeýdegi tizimnen shyǵarady. Al daýys berý kúni qandaı da jaǵdaımen basqa qalada bolatyn saılaýshylar úshin de ońaı jol bar. Ol úshin ózi tirkelgen saılaý ýchaskesinen esepten shyǵý týraly talon alýy shart. Bul qujat 26 jeltoqsannan bastap daýys berýge bir kún qalǵanǵa deıin, ıaǵnı 9 qańtar keshki 18.00-ge deıin beriledi. Osy talonmen saılaýshy ózi tirkelgen aımaqtan basqa elimizdiń kez kelgen óńirinde daýys berýge múmkindik alady.
Osylaısha el azamattary turǵylyqty mekenjaıy boıynsha ǵana emes, syrtta júrip te daýys bere alady. Ol úshin joǵaryda aıtylǵan tásilderdiń bireýin oryndasa bolǵany. Ortalyq saılaý komıssııasy Parlament Májilisiniń jáne máslıhat depýtattarynyń kezekti saılaýy qarsańynda joldaǵan úndeýinde halyqty saılaý quqyǵyn paıdalanyp, belsendi daýys berýge shaqyrdy.
