«Eger siz daýys berý kúninde 18 jasqa tolǵan jáne belsendi saılaý quqyǵyna ıe Qazaqstan Respýblıkasynyń azamaty bolsańyz, Parlament Májilisiniń jáne máslıhat depýtattaryn saılaýǵa quqyǵyńyz bar. Sizdiń saılaýshylar tiziminde bolýyńyz – saılaýǵa qatysýǵa konstıtýsııalyq quqyǵyńyzdyń iske asyrylýynyń kepili. Saılaýshylar tizimin jergilikti atqarýshy organdar jasaıdy. Sizdiń naqty saılaý ýchaskesiniń aýmaǵyndaǵy turǵylyqty jerińiz boıynsha tirkelýińiz sizdi saılaýshylar tizimine engizýge negiz bolyp tabylady. Saılaý ýchaskeleriniń shekarasy jergilikti buqaralyq aqparat quraldarynda 2020 jylǵy 5 qarashadan keshiktirilmeı jarııalanady», delingen Ortalyq saılaý komıssııasynyń úndeýinde.
Ortalyq saılaý komıssııasynyń málimeti boıynsha ár saılaýshy saılaý taǵaıyndalǵan kezden bastap tıisti jergilikti atqarýshy organda saılaýshy retinde tirkelýge quqyly.
«Sizge 2020 jylǵy 10 jeltoqsanǵa deıin saılaý kúni tirkelgen jerińiz boıynsha daýys berýge arnalǵan úı-jaıǵa kelý múmkindigińiz bolmaıtyny belgili bolsa, baratyn jerińizdegi ákimdikke saılaýshylardyń tıisti tizimine qosý týraly jazbasha ótinishpen júginýge quqyńyz bar. Eger siz turaqty tirkelgen jerińizden tys eldi mekende bolsańyz jáne turǵylyqty jerińiz boıynsha ýaqytsha tirkelgen bolsańyz, 2020 jylǵy 10 jeltoqsannan keshiktirmeı, saılaý kúni ózińiz daýys beretin saılaý ýchaskesiniń saılaýshylar tizimine engizý týraly jazbasha ótinishpen ýaqytsha bolatyn jerdegi ákimdikke júginýge quqylysyz», deıdi komıssııa.
Qazaqstannyń Ortalyq saılaý komıssııasy azamattardy saılaýshylar tizimine ený boıynsha barlyq zańdy áreketterdi oryndaýǵa úndedi.
«О́zińizdi saılaýshylar tizimine engizý boıynsha zańdy mańyzdy áreketterdi ýaqtyly qabyldaýyńyz qajet. 2020 jylǵy 26 jeltoqsannan bastap sizge óz saılaý ýchaskeńizdegi saılaýshylar tiziminen ózińiz týraly derekterdi tekserý múmkindigi beriledi», dep túıindedi OSK.
