Is-sharaǵa QR Tuńǵysh Prezıdenti Qory janyndaǵy Álemdik ekonomıka jáne saıasat ınstıtýtynyń basshylyǵy, dıplomatııalyq korpýs pen akademııalyq toptardyń, memlekettik organdardyń ókilderi, birqatar joǵary oqý oryndarynyń stýdentteri jáne basqalar qatysty.
Is-sharany ashqan E. Ashyqbaev talqylanatyn másele Koreı túbegindegi beıbitshilik pen turaqtylyqty qamtamasyz etý isinde ǵana emes, sondaı-aq búkil óńirde jáne álemde uzaq merzimdi qaýipsizdikti nyǵaıtý isinde de óte ózekti jáne mańyzdy ekenine nazar aýdardy. Osy turǵyda ol Tuńǵysh Prezıdent – Elbasy Nursultan Nazarbaevtyń kelesi jyly 30 jyldyǵyn atap ótetin Semeı ıadrolyq polıgonyn jabý týraly sheshimi jahandyq deńgeıde beıbitshilik pen qaýipsizdikti qamtamasyz etýge úlken úles qosqanyn atap ótti.
Otandyq dıplomat elimizdiń qarýsyzdaný salasyndaǵy tájirıbesi Koreıa Halyq Demokratııalyq Respýblıkasy úshin eń úzdik tájirıbe men úlgi bola alatynyn atap ótti. Qazaqstan 2017-2018 jyldary BUU Qaýipsizdik Keńesine turaqty emes músheliginiń eki jyly ishinde Phenıannyń ıadrolyq baǵdarlamasy tóńiregindegi daǵdarysty beıbit, saıası-dıplomatııalyq retteýin nyq jáne dáıekti túrde qoldady.
Is-sharanyń negizgi baıandamashylary retinde Ońtústik Koreıanyń belgili sarapshylary shaqyryldy, olar Qazaqstannyń ıadrolyq qarýsyzdaný salasyndaǵy tájirıbesin mysalǵa keltirip, Seýldiń Koreı túbegin denýklearızasııalaý salasyndaǵy saıasaty týraly, sondaı-aq Koreıa Respýblıkasy men Koreıa Halyq Demokratııalyq Respýblıkasy arasyndaǵy qarym-qatynastardyń qazirgi ahýaly týraly habardar etti.
