Úkimettik emes uıymdardyń belsendiligi artyp keledi

Qoǵam • 26 Qarasha, 2020

Úkimettik emes uıymdardyń belsendiligi artyp keledi

Azamattyq qoǵam turǵynamasyn júzege asyrýda el óńirlerinde qurylǵan úkimettik emes uıymdardyń (ÚEU) jyl saıyn óse túsýde. Mundaǵy basty ustanym azamattyq qoǵam men memleket arasyndaǵy baılanystardy tereńdetýge jáne ózara únqatysýlar men seriktestistikti damytýǵa negizdelgen. Osy oraıda Oral óńirinde áleýmettik,ekonomıkalyq jáne qoǵamdyq mindetterdi júzege asyrýda ÚEUnyń qosyp otyrǵan úlesi súbeli deýge bolady, dep habarlaıdy Egemen.kz.

Temir QUSAIYN

Olardyń sany sońǵy on jyldyń ishinde tórt ese kóbeıgen. Áıtse de azamattyq qoǵam qyzmetiniń basty kórsetkishi sannyń kóptigimen emes, kerisinshe naqty jumys sapasyn kótere bilýimen jáne el-jurtty tolǵandyryp júrgen kókeıkesti máselelerdi sheshý kezindegi syndarly is-qımylymen erekshelenitin eskersek bul turǵyda da oń mysaldar az emes.

Talas joq mundaı jaǵdaıda ÚEU memlekettiń qoldaýyna arqa súıeıtini tabıǵı jáıt. Bul turǵyda Aqjaıyq aımaǵynda jergilikti atqarýshy organdar tarapynan azamattyq qoǵamdy damytýǵa baǵyttalǵan keshendi baǵdarlamalardy qarjylandyrýǵa jan-jaqty kóńil bólinýde. Qazirgi kezde bul baǵytta bólingen qarajat mólsheri 1 mıllıard 300 mıllıon teńgeni quraıdy. Munyń ózi onyń kólemi sońǵy segiz jylda on esege jýyq óskenin kórsetedi.

Osylaısha Oral óńirinde sońǵy jyldar bederinde azamattyq qoǵamǵa júktelgen san-alýan máselelerdi jedel ári kásibı turǵyda sheshe bilýge qabyletti ÚEU qalyptasty desek shyndyqtan aýytqı qoımaspyz. Onyń qatarynda otbasy qundylyqtaryn saqtaý men dáripteý, aımaqtaǵy ýrbanızasııa úrdisin rettý. О́ńirdegi ekologııalyq problemalardyń sheshimin izdestirý jáne múmkindigi shekteýli jandarǵa áleýmettik turǵydan qoldaý kórsetý sekildi san-alýan jobalar bar.

Buǵan qosa azamattyq qoǵam ınstıtýtynyń ókilderi turǵyndarǵa kórsetiletin qyzmettiń sapasyn baqylaý men ony budan ári jaqsartý jónindegi máselelerge de jedel ún qosyp otyr. Osy oraıda oblysta qurylǵan arnaıy monıtorıngtik toptyń róli joǵary deı alamyz. Onyń quramyna birqatar ÚEU-nyń jetekshileri, qoǵam janashyrlary men belgili blogerler jáne maslıhat depýtattary engizilgen. Osy sheńberdegi baqylaý arnalaryna abattandyrý úderisteri, jol qurylysy, áleýmettik nysandar shoǵyry men ózge de ınfraqurylymdyq júıeler kiredi. Atalǵan is-sharalar kesheni boıynsha «Aqjaıyq – adaldyq alańy» jobalyq keńsesi men birqatar qoǵamdyq keńester ilkimdi is-qımyl tantyp júr. Onyń músheleriniń úshten ekisin ÚEU men BAQ jáne memlekettik uıymdardyń ókilderi quraıdy.

Biz osy materıaldy gazet óndirisine ázirleý kezinde Batys Qazaqstan oblysyndaǵy azamattyq alıanstyń prezıdenti Svetlana Tenıshevaǵa jolyǵyp atqarylyp júrgen isteriniń jáı-kúıi jóninde aıtyp berýin ótingen edik. Búgingi kúni óńirdiń azamattyq sektory kókeıkesti máselelerdiń sheshimin tabýǵa qabyletti azamattyq birlestikterdiń berik júıesin quraıdy. Memlekettik qýatty bolýy – myqty azamattyq qoǵamnyń qalyptasýyna da baılanysty ekeni anyq. Osy oraıda úkimette azamattyq baqylaý jónindegi zań jobasyn qabyldaýǵa qatysty júıeli jumystar qolǵa alynǵany azamattyq ınstıtýttyń irgetasyn keńeıte túsýge úlken septigin tıgizedi degen oıdamyz. Sońǵy ýaqytta belsendi azamattardyń áleýetin qoǵamdy odan ári damytýǵa tartý isiniń kókjıegi keńeıip keledi. Alıans qyzmetiniń basty arnasy da osyndaı asqaq murattarǵa negizdelgen. Bul rette respýblıkalyq Azamattyq alıans quramyna kirgen óńirdegi qoǵamdyq birlestikterdiń jetekshileri belsendi is-qımyl tanytyp júr dedi ol.

Mine, osylaısha Oral óńirinde ÚEU belsendiligi jyl saıyn artyp keledi.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz