Halyqaralyq án saıysy 29 qarasha, senbi kúni Varshavada ótedi. Pandemııaǵa baılanysty tikeleı efır kezinde shoý júrgizýshileri Polshada bolady. Al qatysýshylar óz elderinen nómirlerdi beıne baılanys arqyly usynady dep sheshilgen.
Jaýapty syn aldynda Qaraqat iri halyqaralyq baıqaýlardyń jeńimpazy, tájirıbeli ánshi Dımash Qudaıbergenovpen kezdesti. Jas ónerpazben álemge áıgili ánshi 2019 jyldan beri tanys. Ol kezde Dımashtyń týǵan qalasy Aqtóbede Baqytty Bala baıqaýy ótip, Qaraqat úshinshi oryn ıelengen bolatyn.
Búgingi kezdesý Nur-Sultandaǵy ortalyq konsert zalynda boldy. Dımash Qaraqatqa qoldaý bildirip, ákesine arnalǵan «Forever» ánine qatysty.
«Seniń boıyńdaǵy talant meni tebirentti. Ol mindetti túrde basqalardy da tań qaldyratynyna senimdimin», – dep jigerlendire tústi.
Dımash óz tájirıbesimen bólisip, keńes berdi. Nomerdi oryndaýda vokaldan bólek sahnalyq sheberlik qajet. «Jeńiske jetý úshin jaqsy kóńil-kúı de mańyzdy»- dep aqylyn aıtty.
Qaraqat mańyzdy syn aldynda Dımashtyń ózi daıyndyqqa kelip, qatysqanyna qatty qýandy. Kezdesýden shabyt alǵan ónerpaz súıikti ánshisine qoldaý bildirgeni úshin alǵys aıtyp, óz Otanynyń atynan laıyqty óner kórsetýge kúsh salatynyn jetkizdi.
Qaraqatqa Dımashtyń qaryndasy Raýshan da sáttilik tiledi. Jas ónerpazǵa balalar Evrovedenıesine qatysýǵa Raýshan usynys aıtqan bolatyn.
Esterińizge sala keteıik, Qaraqat balalar Evrovıdenıesine Qazaqstan atynan qatysyp otyrǵan úshinshi ónerpaz. Buǵan deıin Junior Eurovision baıqaýynda Danelııa Tóleshova (2018 j.) baq synap, altynshy orynǵa ıe boldy. О́tken jyly bul synnyń ekinshi orynyn Erjan Maksım jeńip aldy.
