Densaýlyq saqtaý mınıstri Alekseı Soıdyń aıtýynsha, elimizde epıdemııalyq jaǵdaı qıyndap barady. О́tken aptamen salystyrǵanda 3 óńir «sary aımaqtan» «qyzyl aımaqqa» kóshti. Bul – Pavlodar, Qostanaı, Aqmola oblystary. Buǵan deıin Shyǵys Qazaqstan men Soltústik Qazaqstan oblystarynda qatań shekteý sharalary engizilip, «qyzyl aımaqqa» engen. Sondaı-aq Almaty qalasy «sary aımaqqa» qosyldy. Qalǵan óńirler – «jasyl aımaqta».
О́ńirlerdegi epıdemııalyq ahýaldy eskere otyryp, búginde aımaq ákimderi qoǵamdyq tamaqtaný oryndaryna kelýshilerdiń sanyn shekteý, kásipkerlik jáne ózge de qyzmet obektileriniń jumys kestesin qysqartý, demalys kúnderi qoǵamdyq oryndardyń jumysyn jáne kólik qozǵalysyn toqtatý sııaqty qatań sharalar qabyldady.
Elimizdiń tus-tusyndaǵy indettiń taralý kórsetkishiniń kúrt ósýine sáıkes karantın talaptary da qatańdatylyp jatyr. «Bul qarqyn báseńdemeı, ahýal ońalmaıtyn bolsa, Qazaqstan boıynsha qatań karantın sharalary engizile me?» degen qaýiptiń bar ekeni ras.
«Apta saıyn málimetterdi zerttep, aldaǵy kezeńderge de boljam jasap jatyrmyz. Qazir kórip otyrǵanymyzdaı, Qazaqstanda karantın sharalaryn jeltoqsan nemese qańtar aılarynda engizý máselesi jaǵdaıdy qanshalyqty baqylaýda ustaı alatynymyzǵa baılanysty bolady. Qazir koronavırýs órshigen keıbir óńirde juqtyrý deńgeıi tómendep kele jatqanyn baıqap otyrmyz. Máselen, Shyǵys Qazaqstanda jaǵdaı rettelip, juqtyrý deńgeıiniń tómendeý úrdisin baqylaýdamyz. Eń bastysy, jaǵdaıdy baqylaýda ustaý. Qazir ınfeksııalyq aýrýhanalar 22 paıyzǵa, jansaqtaý oryndary 17 paıyzǵa júktelgen. Iаǵnı rezerv bar. Sondyqtan qazir ýaıymdaýdyń qajeti joq. Bári baqylaýda», deıdi A.Soı.
Mınıstrdiń aıtýynsha, elimizde
15 myńǵa jýyq ınfeksııalyq tósektik
oryn daıyn. Karantındik stasıonarlarda
6 886 oryn bar, respýblıka boıynsha onyń tek 3,8 paıyzynda pasıent jatyr. Qajet bolǵan jaǵdaıda 51 myńǵa deıin oryn ázirlenedi. Sondaı-aq vırýsty anyqtaıtyn testileýdiń qýaty táýligine 90 myńǵa jetti. Kún saıyn zerthanalarda 40 myńǵa deıin test jasalady. Osylaısha, zerthanalardyń rezervtik qýaty 50 myń zertteýge jetti, ıaǵnı qazaqstandyqtarǵa PTR-test qoljetimdi. Búginde elimizde 4 mln-nan asa PTR-test júrgizildi.
29 qarashadaǵy málimet boıynsha ótken táýlikte Qazaqstanda 826 adamnyń indet juqtyrǵany anyqtalyp, jalpy bul aýrýǵa shaldyqqandar sany 130 865-ke jetken. Onyń ishinde sol kúni 143 adamnyń aýrýdan jazylǵany, jalpy osy ýaqytqa deıin 116 187 adamnyń emdelgeni málim boldy.
Sondaı-aq ótken táýlikte koronavırýs belgileri bar pnevmonııanyń 164 jaǵdaıy jáne 3 ólim jaǵdaıy tirkeldi, 72 adam emdelip shyqty. 1 tamyzdan beri mundaı pnevmonııamen 42 104 adam aýyryp, 443 ólim jaǵdaıy tirkeldi, al jazylyp ketkenderi – 30 494.
El arasynda indettiń ekinshi tolqyny balalarǵa qatty tıedi eken degen sózdiń taraǵany belgili. Bul rette ata-analardy balalarynyń qaýipsizdigi alańdatatyny sózsiz. Oqý jyly bastalǵaly beri 1 741 oqýshy koronavırýs ınfeksııasyn juqtyrǵany anyqtaldy. Onyń
482-si nemese onlaın rejim-
de oqıtyn oqýshylardyń 0,05%-y kezekshi synyptarda oqıtyn oqýshylar arasynan tirkeldi. 1 259 jaǵdaı qashyqtan oqıtyn balalar arasynda anyqtalyp otyr. Sońǵy apta ishinde 12 óńirde kezekshi synyptarda oqıtyn oqýshylar arasynan 129 jaǵdaı rastalǵan. Qyrkúıektiń basynan beri 165 mektep karantınge jabyldy. Búginde 66 mektep – karantınde. Ádette indet anyqtalǵan jaǵdaıda mektep 14 kúnge karantınge jabylady.
Túri jaman indettiń betin qaıtaratyn birden-bir amal vaksına taýyp, tezirek qoldanysqa engizý ekeni anyq. Qazir kópshilik kórshi Reseıdiń vaksınasyn satyp alý jóninde jıi sóz qozǵap júr. Bul rette «Qazaqstandyqtardyń vaksınanyń basqa da túrlerin tańdaýyna múmkindigi bola ma?» degen saýal mazalaıdy?
«Biz únemi naryqta qoljetimdi vaksınalardy izdeımiz. Tirkeýden keıin birinshi bolyp reseılik vaksına shyqty, sondyqtan onda zertteý deńgeıi óte joǵary. Memleket basshysynyń Qazaqstanda osyndaı zaýyt pen óndiristik qýattar salý máselesin pysyqtaýdy tapsyrǵany óte mańyzdy. Bul vaksınanyń qoljetimdiligin qamtamasyz etýge yqpal etedi. Qazir bul másele talqylanyp, óndiriske qolaıly alań qarastyrylýda. Bul jumys istep turǵan farmasevtıkalyq zaýyttardyń janynan ashylýy múmkin. Biz reseılik áriptesterimizben birge elimizde vaksına óndirisin qolǵa alý múmkindigin zerdelep jatyrmyz. Reseılik vaksına synaqtardyń úshinshi kezeńinde, alǵashqy eki kezeńi sátti ótti. Biraq biz otandyq vaksınamyzǵa da úlken úmit artyp otyrmyz. Bıyl jeltoqsan aıynda klınıkalyq synaqtardyń ekinshi kezeńi aıaqtalady. Sondaı-aq biz AQSh, DDU, qytaılyq áriptesterimizben sheteldik vaksınalardy jetkizý máselesin pysyqtaýdamyz. Olardyń elimizdegi barlyq qaýipsizdik hattamalarynan ótýi asa mańyzdy. Barlyq jetkizýshilerdi naryqqa shyǵýǵa jáne qaýipsizdik pen sapany tekserý prosedýrasynan ótip, vaksınany tirkeýge shaqyramyz. Árıne biz vaksınalardyń barynsha kóp mólsheri qoljetimdi bolǵanyna múddelimiz», dedi mınıstr.
Jalpy, «aýyryp em izdegenshe, aýyrmaıtyn jol izde» degendeı, kesapat keselge ushyramaý úshin saqtyq sharalaryn barynsha qatań ustanǵan jón. О́kinishke qaraı, halyq áli de maska taǵýǵa, áleýmettik araqashyqtyq saqtaýǵa salǵyrt qarap júr. Karantın sharalarynyń saqtalýyn baqylaıtyn mobıldi toptar udaıy tekserý jumystaryn júrgizip, kúnine qanshama qaýipsizdik talaptarynyń buzylǵanyn anyqtap jatyr. Bul, árıne epıdemııalyq ahýaldyń kúrt nasharlaýyn kúsheıtedi. Qazirgi qysyltaıań shaqta amandyǵymyzdyń amaly – indettiń aldyn alý. Jaqynymyzǵa janashyr bolyp, jamanat indetti jýytpasaq, ashyq-jarqyn kúnderimiz de oralady.
