О́ńir basshysy «Nurly jer» memlekettik baǵdarlamasy aıasynda baspanaǵa ıe bolǵan 100 turǵynǵa páter kiltin tabystap, qonys toıymen quttyqtady. Búgingi baspana alýshylar qatarynda quqyq qorǵaý salasynyń ókilderi men áskerı qyzmetkerler, muǵalimder, dárigerler, mádenıet salasynyń mamandary bar.
Baspanaly bolǵan turǵynnyń biri jas maman Saıda Májıt memleket tarapynan kórsetilip jatqan qoldaýlarǵa alǵysyn bildirdi. Syrdarııa ózeniniń sol jaǵalaýynan paıdalanýǵa berilgen úıler qurylysyn "Dáneker" jáne «Avangard» JShS júrgizgen.
Saltanatty shara aıasynda baspana ıelerine lebizin jetkizgen oblys ákimi Qyzylorda qalasynda osy jyly 580 páterdi quraıtyn 13 úı paıdalanýǵa berilgenin aıtyp, jyl aıaǵyna deıin qalamyzda taǵy 720 páter beriletinin jetkizdi.
Sońǵy jyldary Qyzylorda qalasynda turǵyn úı qurylysy qarqyn alyp, qala aýmaǵy áldeqaıda keńeıdi. Bul jumystardyń nátıjesinde 9 myńǵa jýyq qyzylordalyq baspanaly boldy. Qazir qala boıynsha 117,3 myń sharshy metrdi quraıtyn 2 myń 546 páterlik 53 kópqabatty turǵyn úıdiń qurylysy júrgizilýde. Onyń ishinde Syrdarııa ózeniniń sol jaǵalaýynda qurylysy júrgizilip jatqan 1 myń 560 páterlik 32 kópqabatty turǵyn úıdiń 16-sy bıyl qoldanysqa berilse, qalǵan 16 úıdiń qurylysy keler jyly aıaqtalady.
Sonymen qatar aldaǵy jyly SPMK-70 turǵyn aýdanynda 13 kópqabatty turǵyn úıdiń qurylysy aıaqtalyp, paıdalanýǵa berilmek. Jeke ınvestorlar esebinen 356 páterlik 8 kópqabatty turǵyn úı qurylysy da qarqyndy júrgizilýde.
