– Qazirgi zamanǵa saı myqty memlekettik apparat qurý isi Tuńǵysh Prezıdent – Elbasy Nursultan Nazarbaevtyń esimimen tyǵyz baılanysty ekeni daýsyz. Táýelsizdiktiń eleń-alań shaǵynda aldymyzda syn-qaterler turdy. Osyǵan oraı Elbasy jańa jaǵdaılarǵa tótep beretin memlekettik basqarý júıesin qalyptastyrýdy kózdedi. О́ıtkeni Táýelsiz Qazaqstannyń básekege qabilettiligin arttyrýda memlekettik apparattyń kadrlyq áleýeti mańyzdy ról atqaratynyn jaqsy túsindi. Memlekettik apparattyń sapasy kez kelgen eldiń damý prosesinde sheshýshi faktorǵa ıe. Sondyqtan bul eldiń strategııalyq basymdyqtarynyń tıimdi oryndalýyn qamtamasyz etýi turǵysynan erekshe mańyzdy boldy. Elbasynyń saıası erik-jigeriniń nátıjesinde Qazaqstan postkeńestik elder arasynda osy baǵytta alǵash bolyp júıeli qadamdar jasady, – dedi oblys ákimi Mahambet Dosmuhambetov.
Ákimniń atap ótýinshe, óńirde memlekettik qyzmetshilerge áleýmettik-ekonomıkalyq turǵydan qoldaý jasalyp otyr. Jyl basynda jergilikti atqarýshy organdar faktorly-baldyq shkalaǵa negizdelgen eńbekaqy tóleýdiń jańa júıesine kóshti. Qanatqaqty modeldiń engizilýi jergilikti kadrlar arasyndaǵy jumys aýystyrýdyń azaıýyna septigin tıgizdi. Máselen, memlekettik qyzmetshilerdiń aýysýy byltyrǵydan 2,6%-ǵa deıin azaıdy. Bul memlekettik apparattaǵy turaqtylyqty qamtamasyz etýge múmkindik berdi. Sonymen qatar jalaqy mólsheriniń ósýi memlekettik qyzmetke degen qyzyǵýshylyqty arttyrdy.
– Bos laýazymdarǵa jarııalanǵan konkýrstarda bir orynǵa qatysýshylardyń sany 50%-ǵa ósti. Sonyń nátıjesinde memlekettik apparat bilikti kadrlarmen tolyǵyp otyr. Qazir oblys ákimdigindegi memlekettik qyzmetkerlerdiń sapalyq quramy da artty. Memlekettik qyzmetkerler qatary 1 ǵylym doktory, 2 ǵylym kandıdaty, 3 PhD doktory jáne «Bolashaq» baǵdarlamasynyń 3 túlegimen tolyqty. Al bos laýazymdardyń sany ótken jylǵydan 4,1%-ǵa deıin azaıyp otyr, – deıdi oblys ákimi.
Tuńǵysh Prezıdent kúnine oraılastyrylǵan konferensııada tórt ózekti másele talqyǵa tústi. Qatysýshylar memlekettik apparattyń ilgeri damýy, aýyldyq okrýg ákimderiniń mártebesi syndy máseleler aıasynda oı bólisip, pikir almasty.
Ekinshi shara – Memlekettik qyzmetshiler alleıasy. Buryn Atyraýda mundaı oryn bolǵan emes. Memlekettik qyzmet isteri agenttigi Atyraý oblysy boıynsha departamentiniń basshysy Salaýat Múksimovtiń aıtýynsha, alleıada áınekten jasalǵan 11 stendte elimiz táýelsizdik alǵan kezden beri memlekettik qyzmetti damytýdyń mańyzdy úsh kezeńi qamtylyp otyr. Sondaı-aq memlekettik qyzmettiń ashyqtyǵy men transparenttiliginiń kórinisi sıpattalypty.
– Bul alleıa «Halyq únine qulaq asatyn memleket» tujyrymdamasyn iske asyrýǵa úles qosyp júrgen memlekettik qyzmetshilerdiń eńbegin ulyqtaý úshin ashyldy. Munda áınekten jasaqtalǵan stendter men memlekettik qyzmetke jańadan kelgen qyzmetshilerdiń ashyq aspan astynda ant qabyldaýyna arnalǵan alań bar, – deıdi S.Múksimov.
Atyraý oblysy
