Rahmet!

Qarapaıym halyq múddesine degen Elbasynyń qamqorlyǵy qashanda zor. «Elimniń tabanyna batqan shógir, meniń mańdaıyma qadalsyn», degen qaǵıdatty pir tutatyn Tuńǵysh Prezıdentimiz qınalǵan jandarǵa qol ushyn berýdi eshqashan keıinge qaldyrǵan emes. Oǵan ulan-ǵaıyr Qazaqstannyń barlyq óńirlerinen kelip jatqan alǵys hattar kýá.

Qarapaıym halyq múddesine degen Elbasynyń qamqorlyǵy qashanda zor. «Elimniń tabanyna batqan shógir, meniń mańdaıyma qadalsyn», degen qaǵıdatty pir tutatyn Tuńǵysh Prezıdentimiz qınalǵan jandarǵa qol ushyn berýdi eshqashan keıinge qaldyrǵan emes. Oǵan ulan-ǵaıyr Qazaqstannyń barlyq óńirlerinen kelip jatqan alǵys hattar kýá.

Iltıpatyn kórip, janym jadyrady

Men Nursultan Ábishulymen alǵash ret 1980 jyldyń sáýir aıynda kezdestim. «Qazaqstan temirjolynyń» oblystaǵy bóliminiń bastyǵy retinde Almatyǵa esep berý jıynyna keldim. Osy basqosýǵa Ortalyq komıtet hatshysy Nursultan Nazarbaev ta qatysty. Sol kezdegi elimizdegi ónerkásip, avtokólik jáne kommýnaldy sharýashylyq salalaryna jetekshilik etti. Esep berý jıynynda ózime qoıǵan suraqtary áli kúnge deıin esimde. Budan keıin Máskeýde ótken KOKP-nyń 27-shi sezinde júzdestik. Odan soń da túrli partııalyq jáne sharýashylyq jıyndarynda jolymyz túıisip júrdi.

1981 jyly Nursultan Ábishuly jumys saparymen oblysqa keldi. Temirjol salasynyń máseleleri jóninde áńgimelestik. Oblys ortalyǵyndaǵy Birinshi Maı kóshesindegi turǵyn úıdiń salynýy ol kisiniń qoldaýymen boı kóterdi. Myna bir estelikti aıtpaı ketý múmkin emes. Prezıdent Aqsý-Degeleń (Kýrchatov) baǵytyndaǵy temirjoldyń ashylý saltanatyna qatysty. Minbede sóılep turǵan Nursultan Ábishuly bir kezde sál kidirdi de: «Dostyq stansasyn jáne Qytaımen aradaǵy temirjol baılanysyn damytý máselesin alǵash kótergen myna kisi», dep kópshilik arasynda turǵan meni nusqady. Osydan birneshe jyl buryn Elbasy oblys ortalyǵyndaǵy elektrolız zaýytynyń ashylýyna qatysty. Bir kezde kóptiń arasynan meni kórip qaldy. Amandasqan soń, densaýlyǵym, otbasym jáne temirjol salasynyń búgingi jaı-kúıi týraly surady. Aıtaıyn degenim, ol kisiniń qarapaıymdylyǵy, bizdi zamandas kórgen ótken kúnderge degen syılasymdylyǵy ǵoı. Iltıpatyn kórip, janyń jadyraıdy. Búginde 70 jastan astym. О́mirden jınaǵan mol tájirıbem bar. Meniń biletinim, eliniń baǵyna qandaı qıyn kezeńde bolsyn jol taba biletin Elbasy bar halqymyzdyń erteńi jarqyn.

Ábı SARQYNShAQOV,

temirjol salasynyń ardageri,

oblystyń Qurmetti azamaty.

PAVLODAR.

Umytylmaıtyn shapaǵat

Bul sonaý 1992 jyly bolǵan oqıǵa edi. Ol kezde men Qarabalyq aýdanyndaǵy Komsomol qus fabrıkasynda mal dárigeri bolyp qyzmet isteıtinmin. Joldasym da osy kásiporynda jumys istedi. Ol jumys basynda óndiristik jaraqat alyp, bir aıaǵynan aıyryldy. Ol kezde baspana kezekpen beriletin, qazirgideı turǵyn úı naryǵy bolmaıtyn. Biz bala-shaǵamyzben tóbesinen sý aqqan eski úıde turyp jattyq. Ekeýmizdiń eńbek ótilimiz 35 jyldaı bolatyn. Kezegimiz kelip ári kásiporynǵa sińirgen eńbegimiz de bar, páter alamyz dep qýanyp júrdik. Ýaqyt ta qıyn edi ǵoı. Bul ólara kezde kásiporynnyń sońǵy salǵan úıi bolatyn. Ony jurt sezindi de. Sondyqtan barlyǵy alyp qalýǵa tyrysty. Biraq ádildik bolý kerek emes pe? Kezegimiz kelse de, jaǵdaı aıaq astynan basqasha sheshiletin boldy. О́ıtkeni, biz turatyn Verenka selosynyń jáne qus fabrıkasynyń basshylyǵy, kásipodaq uıymy biraýyzdy bolyp, páterdi ásker qatarynan endi kelip, úılengen jas jigitke beretin boldy. Bizdiń kezegimiz, ádildik degen aıdalada qaldy. Men aýdandyq ákimshilikke aryzdandym. Biraq odan da nátıje bolmady. Qazir biraz ýaqyt ótip ketti, sol kezde buratartqan kisilerdiń atyn atap qaıteıin. Páter daýyn sol kezde 8 komıssııa qarady, basshylar barlyǵynyń aýzyn alyp qoıdy, barlyǵy da páter Báıtikovterge berilmesin dep sheshti. Meniń amalym taýsyldy. Joldasym múgedek, balalarym jas, ne isteýim kerek. Jumystan sharshap, ashyq túrde bizdi basynǵan basshylardyń qylyǵynan silem qatyp kele jatyp, poshtaǵa kirdim. Sol jerde turyp, Prezıdentke hat jazý oıyma keldi. Ol kezde qazirgideı kompıýter joq, oqýshy dápteriniń bir paraq qaǵazyna kóz jasymdy tógip otyryp, Nursultan Ábishulyna kishkentaı seloda oryn alyp jatqan ádiletsizdik týraly hat jazdym.

Kóp uzamaı men jumys isteıtin Komsomol qus fabrıkasyna oblystyq ákimshiliktiń zań­geri keldi. Jap-jas jigit eken, isti astan-keste­ńin shyǵaryp tekserdi. Zańger qısynsyz qate­likterdiń barlyǵyn ashyp, anyqtama ja­zyp berip ketti. Men osy tekseristiń qory­tyn­­dysyn alyp, aýdan jáne kásiporyn bas­shy­lyǵyn aýdandyq sotqa berip, jeńip shyq­tym. Bizdiń otbasymyz qıyn jyldary Elba­sy Nursultan Nazarbaevtyń arqasynda jańa úıge kirip, jan saqtaǵan edik. Men bul jaqsy­lyqty eshqashan umytpaımyn jáne sodan keıin ádildiktiń saltanat quraryna senetin bolǵanmyn.

Raıa BÁITIKOVA,

eńbek ardageri.

Qostanaı oblysy,

Qarabalyq kenti.

Balamdy zaǵıp bolyp qalýdan Elbasy qutqardy

Búginde 4 jas, 8 aıǵa tolyp otyrǵan balam Nurálı Esimuly dárigerlerdiń salǵyrttyǵynan zaǵıp bolyp qala jazdady. Qalaı ekeni belgisiz, sábıimiz otyratyn ýaqyty kelgende otyra almady. Áýpirimdep eńbekteı bastaǵanda, shaqyrsańyz kelgisi keledi-aq, biraq basqa jaqqa burylyp ketedi. Bul qadam júregime ınedeı shanshyla berdi. Qalaı ǵana qol qýsyryp qarap otyrmaqpyn. Izdendim. Muńymdy gazetterge jazyp, ınternet jelisi arqyly da tyǵyryqtan shyǵý jolyn izdedim. Kóz jasymdy qudaı kórdi. Bir kúni oblys ákimi shaqyryp jatyr degen soń, habarshylarǵa ilesip bardym. Sóıtsem, Elbasy Nursultan Nazarbaev meniń jaǵdaıymdy gazetten oqyp, dereý kómektesý kerek degen uıǵarymmen búldirshinime qol ushyn sozǵan eken.

Sodan Almaty oblysynyń ákimi bas bolyp, oblystyq densaýlyq saqtaý basqarmasynyń bastyǵy Nurálıimniń kózine ota jasatýǵa kiristi. Naqtylaı tússem, ózim ınternet jelisi arqyly tapqan Sankt-Peterbýrg qalasyndaǵy adam kózine ota jasaıtyn dáriger Artýr Baranovqa 2011 jyldyń 16 sáýirinde birinshi otany jasat­­­­tyq. Sátti boldy. Osy sáttilik úshin áýelgi kezek­­te Allaǵa, sosyn Elbasyna aıtar alǵysym sheksiz.

Qudaıǵa shúkir, Taldyqorǵan qalasyndaǵy jeke sektorda qos bólmeli úıdi jalǵa alyp, úsh balammen ómir súrip jatyrmyz. Joldasym kezinde óńirdegi qant zaýytynda jumys istegen, qazir retine oraı ártúrli jumys istep bizdi baǵýda. Úsh balamyzǵa járdemaqy alamyz. Qana­­­ǵat. Eń basty tilegimiz endi Nurálıimizdi Ońtústik Koreıanyń Seýl qalasyna aparyp qosym­sha ota jasatý kerektigin dárigerler udaıy oıymyzǵa salýda. Sonyń reti qalaı bolar eken?

Názıra QABDÝALIEVA,

úı sharýasyndaǵy ana.

TALDYQORǴAN.

Prezıdent tapsyrmasymen salyndy

2005 jyldyń mamyr aıynda Aqjaıyqqa sapary kezinde Elbasy bizdiń ýnıversıtette bolyp, munda tuńǵysh ret «Jasyl el» baǵdarlamasynyń tusaýyn kesti. Ári óz qolymen kóshet otyrǵyzdy. Keıinnen elimizde keńinen órken jaıǵan «Jasyl el» janashyrlarynyń alǵashqy qadamy osylaı bastalyp edi. Bizdiń ujym úshin sol kezdegi bas­ty problemanyń biri – jańadan ashylǵan mashına jasaý fakýltetiniń arnaıy ǵımaratynyń joqtyǵy bolatyn.

Alaıda, biz jambasymyzǵa qara tastaı batyp júrgen bul máseleni Nursultan Ábishulyna aıtýdy qajet dep tappadyq. Bolashaqta áıteýir óziniń retimen sheshile jatar dep uıǵardyq. Joǵary oqý ornynyń stýdentterimen, oqytýshy-professorlar quramymen emin-erkin júzdesip, oı-pikir almasqan Memleket basshysy keterinde: «maǵan aıtar qandaı buıymtaılaryńyz bar, qysylmaı aıtyńyzdar» degen edi.

Tek osy kezde ǵana kókeıimizde júrgen máseleni irkip qalýdyń retin taba almadyq. Aıtaıyn degenimiz, buǵan Elbasynyń tikeleı shapaǵaty tıgen edi. Nurekeń dál sol sátte janynda turǵan sol kezdegi respýblıkanyń Bilim jáne ǵylym mınıstri Birǵanym Áıtimovaǵa bul máseleni shuǵyl arada sheshý jóninde usynys ázirleýge tapsyrma berdi. Bir aıdan keıin Oralǵa sol kezdegi Úkimet basshysy Danıal Ahmetov kelip, mashına jasaý fakýltetiniń jańadan turǵyzylatyn ǵımaraty úshin bir mıllıard teńge kóleminde qarjy bólinetindigin málimdedi. Bul habar bizdi úlken qýanyshqa bóledi.

Kóp keshikpeı qurylys bastalyp ta ketti. Mine, osylaısha stýdentter tálim-tárbıe alyp júrgen búgingi záýlim ǵımarattyń boı kóterýine Elbasymyzdyń ózi bastamashy bolyp edi. Muny qalaı umytarsyń. Búgingi Tuńǵysh Prezıdent kúni merekesinde aımaqtyq ýnıversıtettiń uıymshyl ujymyna úlken qýanysh ákelgen osy jaǵymdy jaıtty oqyrmandar nazaryna usynǵandy jón kórdim.

Qazybaı BOZYMOV,

Jáńgir han atyndaǵy Batys Qazaqstan

agrarlyq-tehnıkalyq ýnıversıtetiniń rektory.

ORAL.

Myń alǵys aıtqan mıllıonnyń birimiz

Aqıyq aqyn Maǵjan Jumabaevtyń «Batyr Baıan» dastany boıynsha túsirilgen tarıhı fılm­degi basty rólge Jambyl oblystyq qazaq drama teatrynyń ártisi Jumahan Ábdiqadyrov tústi. Biraq, ókinishke qaraı, osy talantty akter­ shyǵarmashylyq qyzmetpen saparda júrgen kezinde jol-kólik apatyna ushyrady.

Dárigerge qaralyp, birneshe ret ota jasatty. Biraq, onyń bári kóńildegideı bolmady. Jumahan ekeýmizdiń bir úmitimiz shetel dárigerleriniń kómegine júginip kórý bolatyn. Biraq ol úshin bizge qomaqty qarjy kerek ekeni belgili. Osy jaǵdaıdy aıtyp, elimizdiń Tuńǵysh Prezıdenti atyndaǵy qorǵa habarlastyq. Elbasy Nursultan Nazarbaev bizdiń hatymyzdy qaperge alyp, kúıeýimniń atyna ashylǵan esep-shotqa Elbasy qorynan 5 mıllıon teńge bólgizip berdi.

Biz muny Elbasymyzdyń eline degen, sol eliniń árbir otbasyna degen mıllıondaǵan qamqorlyǵynyń bir ǵana mysaly dep bilemiz. Elbasyna alǵys aıtqan sol mıllıonnyń biri bolǵanymyzǵa biz de shúkirshilik etemiz.

Gúlshat QYPShAQOVA,

Jambyl oblystyq

qazaq drama teatrynyń ártisi.

Jambyl oblysy.