Pavlodarlyq polıseıler jyl basynan beri jol qozǵalysy erejelerin óreskel buzǵany úshin 84 233 júrgizýshiniń ákimshilik jaýapkershilikke tartylǵanyn atap ótti.
"Mas júrgizýshilerdiń qatysýymen bolatyn apattar – aldyn ala boljanbaıtyn jáne eń joıqyn apat. Jyl basynan beri mas kúıdegi kólik júrgizýshileri 31 jol-kólik oqıǵasyn jasady, onyń saldarynan bes adam qaza tapty, 48 adam túrli dene jaraqattaryn aldy. Máselen, bıyl kólik basqarý quqyǵynan aıyrylǵan 116 júrgizýshige qatysty Qazaqstan Respýblıkasy QK 346-baby (Kólik quraldaryn basqarý quqyǵynan aıyrylǵan jáne alkogoldik, esirtkilik jáne (nemese) ýytqumarlyq masań kúıdegi adamnyń kólik quralyn basqarýy, sol sııaqty kólik quralyn basqarýdy osyndaı adamǵa berý nemese kólik quralyn osyndaı adamnyń basqarýyna jol berý) boıynsha qylmystyq is qozǵaldy", dep atap ótti Departament bastyǵy Nurlan Másimov.
Jyl basynan beri tártip saqshylary mas kúıinde kólik júrgizgen 1 257 júrgizýshini anyqtap, ákimshilik jaýapkershilikke tartqan. Sot sheshimimen 1 160 júrgizýshi jeti jylǵa deıingi merzimge júrgizýshi kýáliginen aıyrylyp, 1 334 júrgizýshi 15 táýlikke deıingi merzimge qamaýǵa alynǵan.
"Kúndelikti jedel aqpar jol qozǵalysy erejelerin óreskel buzý faktilerine toly. Polısııa qyzmetkerleriniń eskertýlerine qaramastan kóptegen júrgizýshiler men jaıaý júrginshiler belgilengen erejelerdi elemeıdi", dedi Polısııa departamentiniń bastyǵy Nurlan Másimov.
