О́mirin halyq mýzykasymen egiz órgen dańqty dırıjerdiń shyǵarmashylyqtaǵy eń bir jemisti jyldary Almatyda ótti. Mýzyka zertteýshisi 1967–1968 jyldary ǵumyrynyń sońǵy kezeńderinde turǵan páter búginde shaǵyn mýzeıge aınalǵan. Kórmede usynylǵan túpnusqa eksponattar dál osy Ahmet jáne Ǵazıza Jubanovtar memorıaldy mýzeı-úıi qorynan ákelingen.
Dálirek aıtqanda, kórmede kórnekti tulǵanyń sırek fotosýretteri, arhıvtik qujattar, qoljazbalar, ǵylymı eńbekter men jeke zattarynan turatyn 120-ǵa jýyq jádiger usynyldy. Olardyń qatarynda 1950 jyly shyqqan nemis baspa máshińkesi bar. Bul máshińkege qazaq áripteri engizilgenin kórip, qaıratkerdiń sol kezeńniń ózinde-aq ultqa qyzmet etýdiń ozyq úlgisin kórsetkenin ańǵarasyz. Sonymen qatar Qurmanǵazy atyndaǵy Qazaq ulttyq konservatorııasynda qyzmet atqarǵan kezde kıgen dırıjerlik fragy, 1934 jyly Emanýel jáne Borıs Romanenkolar jasaǵan dombyrasy, notalyq eńbekteri kórme mańyzyn arttyra túsken.
«Bizge jetken estelikterdi saralaı otyryp, Ahmet Jubanov ómirde óte qarapaıym kisi bolǵanyn baıqaımyz. Tiri kezinde bir ǵana mereıtoıy atalyp ótipti. Máselen, búgingi kórmede sol 60 jyldyq mereıtoıynda syıǵa tartylǵan eksponattar bar. Ahmet Jubanovtyń óziniń qoldanysynda bolǵan qol saǵaty, úıde paıdalanǵan ústel saǵaty, radıoqabyldaǵyshy tulǵa qolynyń taby qalǵan jádigerler sanatynda. Saǵatta gravırovka jazbasymen: «Estelik 60 jyldyqqa Saparǵalı jáne Zámzágúl» degen jazba bar. Al qol saǵatyn Abaı atyndaǵy Qazaq ulttyq pedagogıkalyq ýnıversıteti (sol tustaǵy QazPI) syıǵa tartqan. Sondaı-aq baspa máshińkesi – 1950 jyly Germanııada shyqqan», deıdi Ahmet jáne Ǵazıza Jubanovtar memorıaldy mýzeı-úıiniń jetekshisi Ryskúl Saǵatqyzy.
Ryskúl Saǵatqyzynyń aıtýynsha, Ahmet Jubanov qaıtys bolǵannan keıin qyzy Ǵazıza Jubanova sol páterge kóship keledi. Dańqty tulǵanyń ózi ónerge qosqan qyzy ákesine arnalǵan mýzeı ashýdy perzenttik paryzyna balasa kerek. Degenmen ol bul armanyna jete almaı ómirden erte ótti. Araǵa biraz jyl salyp óziniń kúıeýi, áıgili rejısser Ázirbaıjan Mámbetov sol Ǵazıza Jubanovanyń armanynyń oryndalýyna muryndyq bolǵan. Ol pátermen birge Jubanovtar–Mámbetovter otbasynyń muraǵatyn memleket tarapyna tapsyrady. Keıin Ahmet Jubanovtyń 100 jyldyǵyna oraı osy páter-mýzeı bolyp esik ashqan. Aýmaǵy 116 sharshy metrdi quraıtyn mýzeı-úıiniń qorynda kúni búgin 4 myńǵa jýyq eksponat saqtalǵan. Keıbir derekterde bul úıde Jubanovtar áýletine deıin akademık Qanysh Sátbaev turǵany aıtylady.
ALMATY
