2024 jylǵy bilim uıasyna Álimhan Ermekov esimi berildi. Mekteptiń syrtqy qabyrǵasyna alash qaıratkeriniń muraly salyndy, avtory – Almas Syrǵabaı. Kireberisine Á.Ermekov músini ornatyldy, avtory – belgili qolónershi, músinshi Ashat Orazǵalıev.
Mektepte ótken saltanatty is-sharaǵa alashtanýshy ǵalym Tursyn Jurtbaı, aqyn, qoǵam qaıratkeri Ákim Ysqaq, Á.Ermekov áýletinen Farıda Hasenqyzy, ermekovtanýshy Janna Qydyralına, kompozıtor Kentaý Nazarbek, basqa qurmetti meımandar qatysyp, óz pikirlerin ortaǵa saldy. Igilikti iske atsalysqan azamattar Álimhan Ermekov medalimen marapattaldy.
№38 mektep-lıseıdiń dırektory Qadyrǵazy Muqanov: «Mektep-lıseıdiń osyndaı Alash arysynyń esimin ıelenýi úlken mártebe ári bizge zor jaýapkershilik júkteıdi. «Adal azamat» birtutas tárbıe baǵdarlamasy aıasynda kóp jumys atqaryldy. Jas urpaqtyń boıyna Álimhan Ábeýulynyń asyl qasıetterin sińirý maqsatynda 9-synypqa arnalǵan «Álimhantaný kýrsy» bekitildi. Ol qala kóleminde paıdalanýǵa usynyldy. «Tulǵadan – tálim» aıdarymen mektepte alashtaný ǵylymy jolynda ter tógip júrgen ǵalymdarmen kezdesýler uıymdastyrý isi qolǵa alyndy. Ǵalymnyń urpaqtarymen baılanys ornatyldy. Elimizdiń ár óńirindegi Á.Ermekovtiń esimin ıelegen mektepter arasynda ózara yntymaqtastyq memorandýmyna qol qoıyldy. Kóptegen izdenis nátıjesinde buryn kitaptarda jarııalanbaǵan, ǵylymı aınalymǵa tolyq enbegen fotosýretteri qolymyzǵa tústi. Sonyń bári mekteptegi murajaı qorynda», dedi.
Fılologııa ǵylymdarynyń doktory Tursyn Jurtbaı: «1987 jyly UQK muraǵatyn aqtaryp otyryp, Álimhan Ermekovtiń isine úńilgenimde, «keleshekte esimi ulyqtalyp, týǵan halqyna eńbegi men murasy jetse eken» dep, uzaq oılanyp qalǵanym esimde. Álimhannyń isi 17 tom, onyń bárin jazý múmkin emes. Kúbirlep oqyp otyrdym. Japonııadan aldyrǵan kishkentaı magnıtofonym boldy, soǵan jazyp aldym. Búgingi tańda Alash arysynyń óz ultyna oralyp, osylaı nasıhattalyp otyrǵanyna bek qýanyshtymyn. Janqııarlyq erlik jasap, Álimhan Ermekovtiń arymen, sózimen, naqty dálelderimen qorǵap qalǵan Qazaqstan aýmaǵynda búgingi táýelsiz memleketimiz qalyptasty», deı kelip, oqýshylarǵa: «Sizder Álimhan Ermekovteı atyna zaty saı, ójet, bilimdi, ádil, mádenıetti qaıyrymdy bolyp ósińder», dedi.
Sondaı-aq «Álimhan álemi» atty jańa kitaptyń tanystyrylymy ótti. Onda Alash arysynyń ómirbaıany, oı-tolǵamdary engen, qundy derekter men ár jyldardaǵy fotoshejireler qamtylǵan. Belgili ǵalym T.Jurtbaıdyń «Túrme ápsanalary» zertteý eńbegindegi Á.Ermekovti tergeý materıaldary bar. Osy basqosýda jas jazýshy Birjan Ahmerdiń «Jer úshin jantalas» tarıhı-derekti dramasynan úzindi qoıyldy.
Aıbatyr SEITAQ,
aqyn, jýrnalıst
