Jıyn barysynda oblystyq jastar saıasaty basqarmasynyń basshysy Marat Jurqabaev óńirdegi volonterlyq qyzmettiń barlyq baǵyttaryn qamtı otyryp, kúrdeli kezeńde eriktilerdiń kópshilik ıgiligi úshin etken eńbekteri men oblysta uıymdastyrylǵan respýblıkalyq jáne jergilikti aksııalar jóninde baıandady.
Búginde aımaqta 90 volonterlyq uıym bar. Qazvolunteer.kz saıtynda Qostanaı oblysyndabilim alyp jatqan 1125 stýdent jáne 60 uıym tirkelgen. Oblys ortalyǵynda eriktiler qozǵalysyn úılestirip, baǵyttap otyratyn front-ofıs jumys isteıdi. Ofıs qyzmetkerleri ózara kómek kórsetý maqsatynda jasaǵan vlo.kz onlaın-servısi saıty arqyly oblys turǵyndarynyń qandaı da bir kómek alýyna nemese kómek usynýyna múmkindik qarastyrylǵan.
"Búginde elimizde volonterlyq qozǵalys tolyqqandy qalyptasty. Alaıda eriktilerge qarjylandyrý, ǵımaratpen qamtamasyz etý sııaqty júıeli qoldaý kórsetilý kerek. Sondyqtan 2021 jyly oblystaǵy volonterlyq qozǵalysty damytýdyń tujyrymdamasy ázirlenýi tıis", - dedi Marat Jurqabaev.
Basqarma basshysy jergilikti volonterlardyń bıylǵy qatań karantın jaǵdaıynda, ásirese, aýrýhanalar men áleýmettik mekemelerge kóp kómek kórsetkenin erekshe atap ótti. Pandemııa kezinde eriktiler oblys ortalyǵyndaǵy 5 emhanadan 6 myń mekenjaıǵa dári-dármek jetkizgen. 200-den astam volonter provızorlyq stasıonarlarǵa ákelingen ottegi ballondary men ókpege jasandy jolmen aýa jiberetin apparattardy túsirý, ǵımaratqa kirgizý jumystaryn atqarǵan.
"Volonterlar 2 myńnan astam ottegi ballondary men 100 tonnanyń ústinde gýmanıtarlyq kómekke kelgen zattardy túsirdi. Medısına qyzmetkerlerin qoldaý maqsatynda "Myń alǵys" aksııasy uıymdastyrylyp, shara aıasynda 600-den astam medısına qyzmetkerlerine azyq-túlik túrinde kómek kórsetildi. Oblysta jyl basynan beri 800-den astam túrli sıpattaǵy qoldaý sharalary uıymdastyrylyp, oǵan 6 myńdaı volonter atsalysty", - dedi Marat Jurqabaev.
Eriktilerdiń el úshin etken eleýli eńbegi eskersýiz qalyp jatqan joq. Bıyl 122 qostanaılyq volonter Tuńǵysh Prezıdent Nursultan Nazarbaevtyń alǵys hatyna ıe boldy. Sonymen qatar, 25 volonter «Halyq alǵysy» medaline usynylyp otyr. Jeltoqsan aıynyń sońyna taman oblystyń úzdik volontery men úzdik volonterlyq uıymy anyqtalmaq.
