Atalǵan sharany Dúnıejúzilik bank, BUU Balalar qory (IýNISEF), IýNESKO, Dúnıejúzilik densaýlyq saqtaý uıymy men Bilim jáne ǵylym mınıstrligi birlesip uıymdastyrdy.
Halyqaralyq sarapshylar pandemııa kezinde mektepterdiń jabylýy álem boıynsha oqýshylardyń úlgerimine jáne mektep baǵdarlamasyn meńgerý deńgeıine áser etkenin aıtty. «Bilim berýdegi týyndaǵan máselelerdi qalpyna keltirý úshin tıimdi sharalar qabyldaý qajet», deıdi sarapshylar.
Bilim jáne ǵylym vıse-mınıstri Sholpan Karınova karantın kezeńinde qashyqtan oqytý formatyna kóshý barysynda tek syn-qaterler ǵana emes, jańa múmkindikter de paıda bolǵanyn aıtty.
«Osy kezeńde balalardy oqytýǵa múddeli taraptardyń bári ózara jaqyndaı tústi. Ata-analar oqý prosesine belsendi aralasyp, jaǵdaıdy nazarda ustap otyr. Odan bólek bilim berý ınternet-platformalarynyń jumysy jańǵyrǵanyn, sıfrly saýattylyqtyń artqanyn, kompıýterlendirý men keri baılanystyń kúsheıgenin aıta ketken jón», dedi vıse-mınıstr.
Vıse-mınıstrdiń aıtýynsha, qashyqtan bilim berý dástúrli bilim berýdi almastyra almaıdy. О́ıtkeni oqý prosesin uıymdastyrý – bul jaı ǵana oqý úrdisi ǵana emes, sondaı-aq balalardyń ortaǵa beıimdelýi men ózara qarym-qatynas jasaýyna, olardy damytýǵa baǵyttalǵan jumys.
Pandemııa jáne karantındik shekteýler kezinde oqý prosesin retteý úshin birqatar normatıvtik quqyqtyq qujat qabyldandy, baǵalaý júıesi beıimdelip, bilim berýdiń memlekettik standarty men sanıtarlyq erejelerge ózgerister engizildi.
«Biz bul baǵytta sarapshylarmen belsendi jumys istep, qoldanystaǵy jumys tájirıbesine taldaý jasap jatyrmyz. Bul bir kúndik jumys emes, qalpyna keltirý prosesi uzaq úrdis ekenin túsinemiz. Qazirgi tańda mektepterdiń 50%-y, tek 1 mıllıon oqýshy dástúrli formatta bilim alyp jatyr. Biz úshin barlyq bilim berý uıymynyń ashylǵany mańyzdy. Bul úshin epıdemııalyq jaǵdaıdyń jaqsaryp, sanıtar dárigerlerdiń ruqsat berýin kútemiz», dedi Sholpan Karınova.
Halyqaralyq sarapshylar pandemııa kezindegi Bilim jáne ǵylym mınıstrliginiń qyzmetine oń baǵa berdi.
«Qıyn-qystaý kezeńde tek problemalarǵa ǵana basa nazar aýdarmaı, sonymen qatar osy jaǵdaıda ashylǵan jańa múmkindikterge de mán berip otyrǵandaryńyzdy quptaımyn. Qazaqstannyń bilim salasynda jaqsy nátıjelerge jetkenin atap ótkim keledi. Bul kezeńde mınıstrlik ata-analarmen, muǵalimdermen jáne oqýshylarmen ashyq dıalog júrgizdi, bul óte mańyzdy ári qýanarlyq jaǵdaı», dedi bilim salasyndaǵy jetekshi sarapshy, Dúnıejúzilik banktiń ókili Aısha Vaýda.
IýNISEF-tiń Qazaqstandaǵy ókili Artýr Van Dıren muǵalimderdiń pandemııa kezindegi jumysyn erekshe atap ótip, alǵysyn bildirdi.
«Qazirgi tańda kórinbeıtin erlik is jasap jatqan batyrlarymyz – muǵalimder. Qashyqtan oqytý formatyna tez kóshý ońaı sharýa emes. Osy rette muǵalimder qyrýar jumys atqarǵanyn atap ótken jón», dedi Qazaqstandaǵy BUU Balalar qorynyń ókili.
