Calaýatty ómir saltyn nasıhattap, qysqy sport túrlerin jan-jaqty damytýdy maqsat etken festıvalge 100-den astam áýesqoı balyqshy qatysty. Olardyń arasynda tájirıbeli adamdar da az emes. Uzyn-yrǵasy úsh saǵatqa sozylǵan jarys barysynda árbir qatysýshyǵa birneshe qarmaqpen balyq aýlaýǵa ruqsat berildi. Tek bir ereksheligi qarmaqtaǵy ilmekter ekeýden aspaýy kerek.
Qatysýshylardyń ishinde bas jasar baladan seksendi alqymdap qalǵan aqsaqaldarǵa deıin bar. Tipti, muz aıdynyna shyǵyp, qarmaq salǵandar arasynyn áıelderdi de kezdestirýge bolady. Sonyń biri Kókshetaý qalasynyń turǵyny Oksana Shıgrına balyq aýlaýdan adam jany rahatqa bólenip, densaýlyǵy nyǵaıady dep esepteıdi. Ári dostaryńmen birge balyq aýlaýdyń jóni bólek dep túısinedi.
Ereje boıynsha eki nemese odan da kóp qatysýshyda jınalǵan balyq sany birdeı bolsa, jeńimpaz balyqtyń kólemine qaraı anyqtalady. Jarys qorytyndysy boıynsha «Alǵashqy balyq», «Eń kóp balyq», «Eń iri balyq», «Eń úzdik balyq aýlaıtyn otbasy», «Úzdik balyqshy áıel» atalymdarynyń jeńimpazdary marapattaldy. Eń kóp balyq jınaǵan qatysýshynyń qarmaǵyna 48 balyq ilinipti. Jeńimpazdarǵa uıymdastyrýshylar atynan arnaıy dıplomdar men syılyqtar tabys etildi.
