Astanadaǵy «Tilep qobyz» saraıynda Bıbimarııam Omarovanyń «Men qazaqtyń qyzymyn» atty án keshi ótti.
Astanadaǵy «Tilep qobyz» saraıynda Bıbimarııam Omarovanyń «Men qazaqtyń qyzymyn» atty án keshi ótti.
Kishkentaı ǵana Bıbimarııam qazir 8 jasta. Kishkentaı bolsa da búginde talaı-talaı jetistikterge jetip, taý shyńyndaı bıik belesterge umtylǵan jaıy bar. Jas búldirshin bar joǵy alty jasynda Los-Andjeles qalasynda ótken «Gollıvýd-2012» baıqaýyna qatysty. «Baqytty balalyq shaq» atty festıvalinde qazaq, ıspan, aǵylshyn tilderinde án aıtyp, akterlik sheberligimen qalyń kórermendi baýrap alǵan Bıbimarııam 55 eldiń órenderi ishinen oq boıy ozat shyǵyp, bas júldeni jeńip aldy. Sonymen qatar, baıqaý barysynda Nıý Iork fılm akademııasynyń dırektory Den Makler órimdeı jas qyzdyń ónerine súısinip, «Talent Baby» atty balalar fılmine túsýge shaqyrdy.
Jas ónerpaz óziniń tuńǵysh jeke án keshiniń shymyldyǵyn «Gollıvýd – Astana» ánimen ashty. Osydan bólek, Bıbimarııam «Men qazaqtyń qyzymyn!», arab tilinde «Áke» ánin, amerıkalyq ánshi Ýıtnı Hıýston oryndaýyndaǵy ataqty «I will always love» ánin, amerıkalyq jas ánshi ári aktrısa Selena Gomezdiń oryndaýyndaǵy «I love you like love song» ánderin oryndady. Kishkentaı juldyzben qatar kesh barysynda №58 «О́rken» balabaqshasynyń jas ónerpazdary, «Shuǵyla», «Samuryq», «Gúlder-aı» bı ujymdary da óz ónerlerin ortaǵa saldy.
Konsert barysynda kishigirim baıqaý uıymdastyrylyp, 2 búldirshin Marat Omarovtyń «Talant» halyqaralyq óner mektebindegi vokal úıirmesinde tegin bilim alý múmkindigine ıe boldy. Búginde bul mektepte Bıbimarııammen birge Erkesh Hasen, Tomırıs Bekmýrzına syndy 150-den astam daryndy balalar óz ónerlerin shyńdaýda.
Bıbimarııam bıyl Dýbaı qalasynda ótken «Dubai Music Festival» halyqaralyq festıvalinde 37 memlekettiń jas ónerpazdarynyń arasynda «horeografııa» atalymynda úzdik dep tanyldy.
«Bolashaqta qandaı armanyń bar?» degen suraqqa súıkimdi Bıbimarııam: «Men án aıtamyn, bı bıleımin, biraq aktrısa bolǵym keledi. Armanym – «Oskar» syılyǵyn alý», – deıdi. Endeshe, keshte aıtylǵan barlyq tilekter men batalar perishtelerdiń qulaǵyna shalynyp, Bıbimarııamnyń armany oryndalsyn!
Nurzada KÚMISBEK,
L.N.Gýmılev atyndaǵy Eýrazııa ulttyq ýnıversıtetiniń stýdenti.
