Qazaq mýzyka óneriniń esimi ańyzǵa aınalǵan kórnekti ókili, KSRO jáne Qazaqstan Respýblıkasy Memlekettik syılyqtarynyń laýreaty, qazaq halqynyń súıikti ánshisi Bıbigúl Tólegenova jaıly kitap jaryqqa shyqty. Keshe elordadaǵy «Qazaqstan» konsert zalynda «Bıbigúl Tólegenova: súıispenshilik, úmit jáne senim» dep atalatyn sol kitaptyń tusaýy kesildi.
Qazaq mýzyka óneriniń esimi ańyzǵa aınalǵan kórnekti ókili, KSRO jáne Qazaqstan Respýblıkasy Memlekettik syılyqtarynyń laýreaty, qazaq halqynyń súıikti ánshisi Bıbigúl Tólegenova jaıly kitap jaryqqa shyqty. Keshe elordadaǵy «Qazaqstan» konsert zalynda «Bıbigúl Tólegenova: súıispenshilik, úmit jáne senim» dep atalatyn sol kitaptyń tusaýy kesildi.
Belgili tulǵa jaıly kitap jazý qyzyq dep oılaımyz. О́ıtkeni, onyń tirshiligi óz shańyraǵynyń, qala berdi týǵan-týys, dos-jarannyń mańaıynda ǵana órbıtin anaý-mynaý qarapaıym adamnyń ómirinen anaǵurlym kúrdeli, áserli bolsa kerek. Ásirese, ásem ánimen, bulbul únimen talaılardyń janyn terbegen, júregine sáýle sebelegen, osy kúni seksenniń seńgirine shyqqanymen, sahnalardan áredik jalt etip kórinip júrgen Bıbigúl Tólegenova syndy ańyz ánshiniń ómir jolynda tanymdyq ta, taǵylymdyq ta oqıǵalar jıi kezdesýi tıis. Bul jerde ánshi týraly kitapty kim jazǵany da mańyzdy. Kúni keshe ómirden ozǵan qazaqtyń qadirli ánshisi Ermek Serkebaevtyń qyzy, osyǵan deıin úsh kitabyn oqyrmanǵa usynyp úlgergen, Bıbigúl apaıǵa kishkentaı kezinen etene ósken Irına Serkebaeva jazyp otyr. Kitaptyń alǵysózinde Irına «Meniń jumys ústelimde onyń ramaǵa salynǵan portreti turady. Jap-jas kezi. Qyz Jibek obrazynda ulttyq kıimdegi tańǵajaıyp arý. Áldebireýge qarap kúlimsiregen onyń jaıdary júzine kóz almaı qaraımyn. Men úshin Bıbigúl Tólegenova daýysy – taý bókterindegi kóktem lebi, keńsirigińdi kere dem alatyn gúl jaınaǵan alma baǵy, káýsár bulaqty kómkergen appaq tastar tizbegi men taý sýyndaı móp-móldir meniń balǵyn balalyq shaǵym. О́z basym qansha jerden tizginsiz Stıv Taılerge tabynýshylardyń biri bolsam da, meniń jan dúnıemdi jelep-jebeýshi áýenim árqashanda «Qazaq valsi». Tipti, myna bir shalǵaıdyń shalǵaıy Amerıkada júrsem de dál solaı» – dep oı tolǵaıdy. Osy kitaptyń jazylýyna ánshini janyna jaqyn tutyp, shyn júregimen jaqsy kórgeni, odan qalsa ata-anasynyń Bıbigúl Tólegenova týraly mazmundy, ǵıbratty áńgimeleri sebep bolǵanyn baıandaıdy.
Kitap ánshiniń ózi baıandap bergen estelikteri negizinde jazylǵan. Onda basty keıipkerdiń ómiri, otbasy, óner joly, qyzmeti, ómirinde mańyzdy oryn alatyn adamdar túgelge jýyq qamtylǵan. Tusaýkeser sharasynda ánshi ózi jaıly jazylǵan dúnıeniń jaryqqa shyǵýyna septigin tıgizgen «Atamura» baspasyna, qarjylaı qoldaý kórsetken «PetroQazaqstan» jáne Nort Kaspıan Opereıtıng kompanııalaryna alǵysyn bildirdi. Ánshilik ǵumyrynyń estelikteri órnektelgen kitaby arqyly qalyń elimen oı bóliskenin, syryn aqtarǵanyn jetkizdi. Keshke arnaıy qonaq retinde qatysqan qazaqtyń tuńǵysh ǵaryshkeri Toqtar Áýbákirov ánshiniń ásem únin Máskeýdiń Ortalyq stadıonynan tyńdaǵan sátin, qazaqtyń sulý sazyn estigendegi tebirenisin, sol sazdy jetkize bilgen únde ómir súrýge qushtarlyqty oıatatyn, arman-maqsatyńa jetýge talpyndyratyn kúsh-qýat bolǵanyn ómirindegi eń bir umytylmas oqıǵalardyń birine balap, ańyz ánshige inilik iltıpat bildirdi.
Kesh barysynda Bıbigúl Tólegenovamen kezdesýge jınalǵan qaýym Syrtqy ister mınıstri Erlan Ydyrysovtyń, Qarjy mınıstrliginiń jaýapty hatshysy Natalıa Korjovanyń, Nort Kaspıan Opereıtıng kompanııasynyń tóraǵasy Per Offmannyń júrekjardy lebizderin tyńdap, operada ózindik órnekteri bar jas ánshiler Dına Hamzına, Azamat Jyltyrkózov, Elena Nızamýtdınovalardyń ónerin tamashalady.
Shara sońynda ánshi keshke jınalǵandarǵa ózi jaıly kitapty óz qoltańbasymen úlestirdi.
Aıgúl SEIILOVA,
«Egemen Qazaqstan».
Sýretterdi túsirgen
Erlan OMAROV.
