Aımaqtar • 24 Jeltoqsan, 2020

«Shymkentaqparat.kz» jańa aqparattyq portalynyń tanystyrylymy ótti

253 ret kórsetildi

Shymkent qalasy ákimdigi janyndaǵy buqaralyq aqparat quraldarymen ózara is-qımyl jónindegi keńestiń kezekti otyrysy ótti, dep habarlaıdy Egemen.kz

Qala ákiminiń birinshi orynbasary Shyńǵys Muqannyń tóraǵalyǵymen ótken májiliske jergilikti baspasóz basylymdarynyń bas redaktorlary men telearna basshylary, aqparattyq portal jetekshileri men jýrnalıster qatysty.

– О́zderińizge belgili, Shymkent qalasy ákimdigi janyndaǵy buqaralyq aqparat quraldarymen ózara is-qımyl jónindegi keńes qurylyp, 2020 jyldyń 9 qarashasy kúni alǵashqy otyrysy ótkizilgen bolatyn. Sol keńeste Shymkent qalasynyń Densaýlyq saqtaý, Energetıka jáne kommýnaldyq sharýashylyq, Jolaýshylar kóligi jáne avtomobıl joldary basqarmalarynyń esepteri tyńdaldy. Búgingi Keńestiń kún tártibine sáıkes, «Shymkentaqparat.kz» dep atalatyn jańa aqparattyq portaldy tanystyrmaqpyz. Bul saıt turǵyndarǵa resmı aqparat taratýmen qatar, megapolıske qatysty mazmundy, tarıhı-tanymdyq, saraptamalyq maqalalardy usynbaq. Resmı aqparattyq qoldaý – Shymkent qalasy ákiminiń baspasóz qyzmeti, «Shymkent kelbeti» gazetiniń redaksııasy jáne Shymkent qalasynyń «Aqparattyq kommýnıkasııalyq ortalyǵy» tarapynan bolady, dedi Shyńǵys Muqan.

Jıynda Shymkent qalasynyń Ishki saıasat jáne jastar isteri jónindegi basqarmasy «Aqparattyq kommýnıkasııalyq ortalyǵynyń» dırektory Nurbol Orymbaı aqparattyq portaldy iske qosýdaǵy negizgi maqsaty týraly baıandap ótti.

– Jalpy Shymkent qalasynda 40 shaqty túrli baǵyttaǵy jergilikti saıt tirkelgen. Olardyń ishinde Shymkent qalasy ákimdiginiń «shymkent.gov.kz» saıty da bar. Ol saıt tek resmı aqparat taratýmen shektelse, «shymkentaqparat.kz» portalynyń shyǵarmashylyq aıasy keń, aýdıtorııasy úlken. Osy rette saıttyń barlyq áleýmettik jelide paraqshalary men jeke «youtube» arnasy ashyldy, – dedi Nurbol Orymbaı.

Májiliste BAQ salasynyń jáne qalamyzdyń áleýmettik-ekonomıkalyq damýyna eleýli úles qosqan birqatar azamattar QR Prezıdentiniń Qurmet gramotasymen, Shymkent qalasy ákiminiń Alǵys hatymen jáne «Halyq alǵysy» medalimen marapattaldy. 

Keńes barysynda qatysýshylar usynystaryn aıtyp, ózara pikir almasty. Otyrysty qorytyndylaǵan Shyńǵys Muqan qatysýshylardyń kótergen máseleleri eskeriletinin jetkizdi. 

Sońǵy jańalyqtar

Suıytylǵan gaz baǵasy óspeıdi

Qoǵam • 01 Shilde, 2022

Uqsas jańalyqtar