«Oryndar sanyn 30 paıyzdan asyrmaı, kórermenderdi eki oryn saıyn jáne qatar boıynsha shahmat tártibimen otyrǵyzý arqyly, kúsheıtilgen sanıtarlyq-epıdemıologııalyq normalardy saqtaı otyryp kınoteatrlardyń jumys jasaýyna ruqsat etiledi. Kınoteatrlar jumys, demalys jáne mereke kúnderi saǵat 10:00-den 24:00-ge deıin jumys isteıdi. Aksııalar ótkizilmeıdi. Eger karantın jáne shekteý sharalaryn buzý faktisi anyqtalsa, kınoteatrlardyń jumysy toqtatylady», dedi qalanyń bas sanıtarlyq dárigeri Janna Pirálıeva.
Elorda ákimdigi baspasóz qyzmetiniń málimetinshe, sonymen qatar mereke qarsańynda meıramhanalardyń, kafelerdiń, barlardyń, ashanalardyń jumys ýaqyty úlken kezekter týyndaýyna jol bermeý maqsatynda saǵat 00.00-ge deıin uzartylady.
Bul rette ǵımarat ishinde 30 orynnan artyq bolmaýy, sanıtarlyq-epıdemıologııalyq, sanıtarlyq-profılaktıkalyq sharalardyń saqtalýy, ústelder arasynda keminde 2 metr áleýmettik araqashyqtyq saqtalýy, ár ústelge 4-6 adamnan artyq otyrǵyzylmaýy kerek. Bul qaýly turǵyn úılerde ornalasqan nysandarǵa qatysty emes. Olardyń jumys ýaqyty - saǵat 22:00-ge deıin.
Oıyn-saýyq, sporttyq jáne basqa da buqaralyq is-sharalardy, onyń ishinde jańajyldyq erteńgilikterdi, korporatıvterdi ótkizýge tyıym salyndy. Karantın jáne shekteý sharalary buzylǵan jaǵdaıda nysandar qyzmeti toqtatylady. Buǵan deıin habarlaǵanymyzdaı, elordada sýpermarketter men gıpermarketterge táýlik boıy jumys isteýge ruqsat etildi.
