Eýrazııalyq ıntegrasııa ınstıtýtynyń uıymdastyrýymen ótken is-sharaǵa jınalǵan otandyq ǵalymdar men sarapshylar dúnıe júzine aýyrtpalyǵymen kelgen kúrdeli jylda bolǵan basty oqıǵalardy saraptady. Jıyn moderatory saıasattanýshy, saıası ǵylymdar kandıdaty Erlan Saırov turaqsyz álemdegi turaqtylyqty saqtaýdyń alǵysharttaryn aıta kele, elimizdiń qoǵamdyq-saıası ómirindegi basty oqıǵalarǵa bıliktiń bergen jaýaby men áreketine tolyǵyraq toqtaldy. Talqylaý saıası baǵyttyń sabaqtastyǵy, saıası, ekonomıkalyq, áleýmettik reformalardy júrgizý, tıimdi daǵdarystyq menedjment, qoǵam men memleket arasyndaǵy ózara senim radıýsyn keńeıtý sekildi baǵyttarda órbidi.
«Prezıdenttiń 2020 jylǵy kún tártibindegi negizgi baǵyttardyń biri – daǵdarysqa qarsy saıasat pen damýdyń jańa jaǵdaılaryna beıimdelýdiń bir bóligi bolyp tabylatyn reformalar boldy. Ulttyq qoǵamdyq senim keńesi qurylyp, saıası reformalardyń birinshi paketi daıyndaldy. «Halyq únine qulaq asatyn memleket» qurýǵa, ádilettilik pen teń múmkindikter qaǵıdattaryn ilgeriletýge jáne bekitýge baǵyttalǵan elimizdegi demokratııalyq ózgeristerge tyń serpin beretin reformalardyń jańa paketi daıyndalýda», dep atap ótti E.Saırov.
Belgili sarapshy Ǵalym Baıtuq bıylǵy jyldyń aıtýly oqıǵalarǵa toly bolǵanyn eskere kele, saılaý máselesine erekshe toqtaldy. Ol elde ótken praımerız kezinde saıası sahnada buryn belgili bolmaǵan, belsendi azamattardyń paıda bolǵanyn úlken jetistikke teńedi. Onyń aıtýynsha, bul saılaý naýqanyn qyzdyra túsedi jáne daryndy, bilikti mamandardyń el aldyna shyǵyp, óz kúshterin synaýyna taptyrmas múmkindik. Odan bólek Ǵ.Baıtuq Qazaqstanda volonterler qozǵalysynyń jańa serpin alyp odan ári damýyn, qoǵamda ıgi isimen kópke úlgi bolar tulǵalardyń qatary kóbeıgenin de jetistikke teńedi.
Saıasattanýshy Baýyrjan Tólegenov bıylǵy jyldyń basty qıyndyqtaryn atap ótti. «Bıyl el bıligi betpe-bet kelgen syn-tegeýrinder kóp boldy. Olardyń qataryna munaı baǵasynyń tarıhı tómendeýin, koronavırýs pandemııasy men onyń saldarynan týyndaǵan ekonomıkalyq daǵdarysty jatqyzýǵa bolady. Qazaqstan bıligi eń aldymen halyqtyń densaýlyǵyn qorǵaý, ekonomıkalyq jáne áleýmettik turaqtylyqty qamtamasyz etý baǵytynda daǵdarysqa qarsy jedel jospar qurýǵa basa nazar aýdardy», dedi maman.
Saıası keńesshi Dına Aıkenova memleket pen bılik arasyndaǵy keri baılanysty ornatý men onyń nátıjelerin saraptady. Onyń aıtýynsha, 2020 jyldyń negizgi baǵyttarynyń biri – memleket pen bıliktiń qoǵamdyq saýaldarǵa den qoıýy boldy. Osy turǵyda Memleket basshysy halyqpen keri baılanys ornatý, pikirler plıýralızmine jaǵdaı jasaý arqyly qoǵam men memleket arasyndaǵy ózara senim radıýsyn keńeıtýge baǵyttalǵan «halyq únine qulaq asatyn memleket» tujyrymdamasyn iske asyrýdy jalǵastyrdy. Sarapshy azamattardyń quqyǵyn qorǵaý men jeke adamǵa qarsy jazalardy qatańdatý baǵytynda úlken jumys júrgizilgenin basa aıtty.
Is-sharaǵa qatysqan qoǵam qaıratkerleri, sarapshylar men ǵalymdar bılik pen qoǵam úshin túrli synaqqa toly jylda elde bolǵan basty oqıǵalardy túıindeı kele, joǵaltqanymyzdy túgendep qana qoımaı, atqarylǵan ıgi ister men uzaq merzimde nátıje berer utymdy sheshimderdiń kóptigine biraýyzdan kelisti.
