«Halqymyzdy Jańa jyldy úıde qarsy alýǵa shaqyramyn. Bul bolashaqta koronavırýs ınfeksııasynyń taralýyn boldyrmaý úshin óte mańyzdy. Bıyl bárine qıyn boldy, degenmen, eger biz barlyq sharalardy - maska taǵyp, araqashyqtyq saqtaıtyn bolsaq, jaǵdaı jaqsarady jáne turaqtanady», - dedi Janna Pirálıeva.
Elorda qazir «sary» aımaqta. О́tken táýlikte qalada KVI aýrýynyń 60 jańa jaǵdaıy anyqtaldy. Qoǵamdyq densaýlyq saqtaý basqarmasynyń habarlaýynsha, qys bastalǵaly beri Nur-Sultanda orta eseppen kúnine COVID-19 aýrýynyń 79 jaǵdaıy tirkeldi. Qazir qaladaǵy juqpaly aýrýlar stasıonarlarynda 204 adam jatyr.
Qalada aýrýshańdyq joǵarylaǵan jaǵdaıda 7 myń oryndyq 18 nysan birtindep qaıta beıimdeledi. COVID-19 úshin bıomaterıal jınaýǵa arnalǵan zerthanalar sany 19-ǵa deıin kóbeıtildi, olardyń jalpy qýattylyǵy táýligine 12 myń testileý.
Sondaı-aq bas sanıtarlyq dáriger bıznestiń jańa jumys rejımi týraly aıtty. Atap aıtqanda, jańa jyldyq keshterge, korporatıvterge jáne basqa da birqatar sharalarǵa tyıym salyndy. Saýda alańy 2 myń sharshy metrden asatyn tamaq ónimderin satatyn gıpermarketter men sýpermarketter táýlik boıǵy jumys rejımine kóshti. Sondaı-aq 26 jeltoqsannan bastap kınoteatrlar kúsheıtilgen sanıtarlyq-epıdemıologııalyq normalardy saqtaı otyryp, kórermenderdi qatardyń boıymen eki oryndyq saıyn jáne qatarlar arasynda shahmat tártibimen otyrǵyzý, oryn sanyn 30%-dan asyrmaý sharttarymen ashylady. Kınoteatrlardyń jumys, demalys jáne mereke kúnderindegi jumys ýaqyty 10.00-den 24.00-ge deıin, eshqandaı aksııalarsyz. Sonymen qatar kafe men meıramhanalardyń jumys ýaqyty 24.00-ge deıin uzartyldy.
Nur-Sultanda karantın jáne shekteý sharalarynyń saqtalýy boıynsha kásipkerlik sýbektilerine monıtorıng jalǵastyrýda. 5 shildeden bastap aýdandyq sanıtarlyq-epıdemıologııalyq baqylaý basqarmalary ákimshilik jaýapkershilikti buzǵany úshin 1380 jeke, laýazymdy jáne zańdy tulǵalarǵa jalpy somasy 270 936 114 teńge aıyppul saldy.
