Kezdesý barysynda turmystyq qajettilikke baılanysty shashtaraz, saýda dúkenderi syndy taǵy da basqa áleýmettik nysandarǵa barý úshin ınvataksı qyzmetin qoljetimdi etýdi suraǵan múmkindigi shekteýli jandarǵa «Sizderdiń talap-tilekterińiz oryndalady. 2021 jyldan bastap atalǵan maqsatta ınvataksı qyzmetin paıdalanýǵa eńbekti qorǵaý zańnamalaryna saı múmkindik jasaımyz» - degen, shahar basshysy buǵan deıin qalada 11 avtokólik ınvataksı qyzmetin atqarsa, endi olardyń sany 13-ke jetkendigin aıtty.
Qabyldaýdaǵy kóp tileginiń taǵy biri – 2 top múgedektigi bar azamattardyń qoǵamdyq kólikte tegin júrýi. Bul máselege qatysty qala ákimi sala basshylaryna qajetti sýbsıdııa kólemin eseptep, tez arada usynys berýdi tapsyrdy.
Sonymen qatar qabyldaýǵa kelgen azamattar 2019 jyldyń naýryz-sáýir aılarynda jeke kómekshilerge qyzmet aqysy tólenbeı qalǵanyn aıtyp, ony óndirýge zań aıasynda kómek berýdi surady. О́z kezeginde qala basshysy ol tólemderdi júrgizýge bıýdjet múmkindigi tolyq jetetindigine toqtalyp, kómekshilerdiń eńbekaqysyn tóleý jumystary jyl basynda zań júzinde júzege asatyndyǵyn jetkizdi.
Kezdesý barysynda «Oblystyq mylqaýlar qoǵamynyń» tóraıymy Altynkúl Aıapova múmkindigi shekteýli jandardyń máselesin kezek kúttirmeı sheship, udaıy qoldaý bildirip kele jatqan qala ákimine alǵysyn bildirip, aǵymdaǵy jyly mylqaýlar klýbynyń shahar basshysynyń tapsyrmasymen demeýshilik esebinen kúrdeli jóndeýden ótkenin erekshe qýanyshpen atap ótip, «Bul bizge jasalǵan kóp qamqorlyqtyń biri ǵana» - dedi.
Kezdesý sońynda qala ákimi múmkindigi shekteýli azamattardyń quqyǵyn qorǵap, olardy áleýmettik qoldaý kún tártibindegi negizgi máselelerdiń biri ekendigin basa aıtyp, qamqorlyqty qajet etetin jandarǵa qolaıly orta qalyptastyrý baǵytyndaǵy jumystar jalǵasatyndyǵyn jetkizdi.
