«Mahabbat sýsyny» – ıtalııalyq sazgerdiń shyǵarmashylyq zor tabysynyń biri. Fransýz qoıýshysy Arno Bernar rejısserlik emes, dástúrli opera jolyn ustanyp, spektakldi ótken dáýirge tolyqtaı laıyqtap jasady. Degenmen, opera janry shartty dúnıe, sondyqtan bul klassıkalyq qoıylym Arno Bernardyń qyzyqty oı-paıymdarymen árlene tústi, atap aıtqanda, keıipkerler sahna keńistiginiń astynan paıda bolyp, al alaıaq Dýlkamara spektakldiń sońynda áýe sharymen ushyp ketse de, osynyń bári zamanaýı shyndyq turǵysynan óte úılesimdi kórindi ári kompozıtordyń uly týyndysyn jańa zaman kórermeniniń qabyldaýyna bir taban jaqyndata tústi.
Álemniń kóptegen elderine tanylǵan qoıýshy dırıjer Alan Bóribaev pen rejısser Arno Bernardyń, zamanymyzdyń kórnekti ssenografy Esıo Frıdjerıo men kostıýmder boıynsha sýretshi, «Oskar» syılyǵynyń laýreaty Franka Skýarchapınonyń júıeli jumysynyń arqasynda ótken ǵasyrda oryn alǵan qarapaıym hıkaıadan jastyqtyń jalyny men ómirge degen qushtarlyq esip turdy.
Bas keıipker Nemorıno (Jan Tapın, Damır Sádýaqasov) dáýletti arý Adınaǵa (Saltanat Ahmetova, Alfııa Karımova) ǵashyq, biraq sezimin bildirýden qorqaqtaıdy. Adına da serjant Belkorege (Talǵat Musabaev, Talǵat Ǵaleev) turmysqa shyǵa jazdaǵanyna qaramastan, shyn máninde Nemorınony jaqsy kóredi. Jaǵdaıdyń túıinin dúmshe emshi Dýlkarama (Baýyrjan Ánderjanov, Evgenıı Chaınıkov) sheshedi.
Barlyq ártister keıipkerleriniń beınesin tolyqtaı asha bildi.
