Sapar barysynda «Infraenergo» elektrotehnıka ónimderin shyǵaratyn kásiporyn ujymymen kezdesip, partııanyń óńirlik saılaýaldy baǵdarlamasynyń negizgi basymdyqtary talqylandy. Nur Otan aldaǵy 5 jylda óńirde 134 myńnan astam jumys ornyn ashýdy, 31 myń oryndy quraıtyn 80 jańa mektep salý arqyly úshaýysymdy oqý máselesin sheshýdi, 120 aýyldyń 190 myń turǵynyn sapaly aýyz sýmen qamtamasyz etýdi, 72 densaýlyq saqtaý nysanyn, sondaı-aq 120 myńnan astam páter salýdy josparlap otyr. Sondaı-aq saılaýaldy shtab músheleri BAQ ókilderimen, otandas-qandastarmen jáne jastarmen kezdesti.
Almaty oblysyna sapary barysynda Nur Otan partııasy Tóraǵasynyń birinshi orynbasary Baýyrjan Baıbek birqatar azamattardy qabyldady.
Máselen, qabyldaýda Nazerke Ábdihalyqova Raıymbek aýdanynda emhana salý máselesin kóterse, Shonjy aýylynan kelgen kóp balaly ana Zaǵıra Álimhodjaeva salynyp jatqan jaldamaly turǵyn úı sanyn arttyrýdy ótindi. Al Amangeldi Sháripqulov Aıteı aýyly turǵyndary elektrmen jabdyqtaý máselesin sheshý jónindegi ótinishin jetkizdi.
«Elbasy, partııa Lıderi Nursultan Nazarbaev atap ótkendeı, «Azamattarmen árdaıym tyǵyz baılanysta bolý – bizdiń partııamyzǵa kórsetiletin taýsylmas halyqtyq qoldaýdyń qaınar kózi». Jalpy, úgit kezeńi bastalǵannan beri bizdiń qoǵamdyq qabyldaýlarǵa 56 myńnan astam ótinish tústi, onyń ishinde 20 myńdaıy – saılaýshylardyń usynysy men amanaty. Kandıdattar men senim bildirilgen tulǵalar 7,3 myń qabyldaý ótkizdi. Halyq tarapynan túsken barlyq ótinish pen amanat erekshe partııalyq baqylaýǵa alynady», dedi partııanyń Respýblıkalyq saılaýaldy shtab jetekshisi.
Partııanyń baspasóz qyzmetiniń habarlaýynsha, azamattardy negizinen áleýmettik máseleler tolǵandyrady. Máselen, ótinishterdiń 22 paıyzy áleýmettik qamtamasyz etý jóninde bolǵan. Sondaı-aq kelip túsken ótinishterdiń 12 paıyzy turǵyn úı men jer ýchaskelerin bólýge arnalǵan. Budan bólek, jumysqa ornalastyrý jáne eńbek daýlary (8 paıyz), densaýlyq saqtaý (6 paıyz), bilim berý (5 paıyz) máseleleri bar.
Aıta keterligi, Nur Otan partııasy turǵyndardy tolǵandyrǵan máselelerdi kezeń-kezeńimen sheshýdi josparlap otyr.
