AShM Jer resýrstaryn basqarý komıtetiniń tóraıymy G. Bımendına Prezıdenttiń tapsyrmasyna sáıkes mınıstrlik aýyl sharýashylyǵy jerleriniń kosmomonıtorıngin engizý úshin zańnamalyq baza daıyndaǵanyn jáne paıdalanylmaıtyn jerlerge salyq mólsherlemesi 20 esege artqanyn aıtty.
Bul paıdalanylmaı jatqan jerlerdi anyqtaý prosesin edáýir jedeldetti. 2020 jyly 8 mln-daı paıdalanylmaǵan gektar anyqtaldy, bul – 2016, 2017 jáne 2018 jyldary atqarylǵan jumys kórsetkishinen jarty mıllıonǵa artyq.
«Memleket basshysy Ulttyq qoǵamdyq senim keńesiniń ekinshi otyrysynda barlyq daıyndyq jumystaryn aıaqtap, 2020 jyly birqatar oblysta jerdi kosmomonıtorıngteý boıynsha pılottyq joba engizýdi tapsyrǵan bolatyn. Atalǵan tapsyrmaǵa sáıkes kosmomonıtorıng boıynsha synaq jobasy Aqmola, Qostanaı, Shyǵys Qazaqstan jáne Mańǵystaý oblystarynda júzege asyryldy. Bul aımaqtar kezdeısoq tańdalǵan joq, sebebi dál osy aımaqtardan jer paıdalaný salasy boıynsha eń kóp shaǵymdar kelip túsken edi», dedi G. Bımendına.
Onyń aıtýynsha, 4 óńirde 8,3 mln ga paıdalanylmaıtyn jer anyqtalǵan. Onyń ishinde 0,7 mln ga – egistik jáne 7,6 mln ga – jaıylymdyq jerler.
«Memlekettiń menshigine 4,2 mln ga jer qaıtaryldy, 4,8 mln ga jer aýyl sharýashylyǵy aınalymyna tartyldy. Bul jerdi paıdalaný men qorǵaýǵa memlekettik baqylaýdyń kúsheıtilgenin, sondaı-aq, qabyldanyp jatqan sharalardyń qatańdatylǵanyn kórsetedi», dep tolyqtyrdy Jer resýrstaryn basqarý komıtetiniń tóraıymy.
2020 jyldyń jeltoqsanynda pılottyq joba óz jumysyn aıaqtady. Synama sátti bolǵandyqtan, Úkimet 2021 jylǵy 1 qańtardan bastap búkil respýblıka aýmaǵynda «kosmomonıtorıngti» engizý týraly sheshim qabyldady.
Sonymen qatar QR AShM aýyl sharýashylyǵy jerlerin óndiristik aınalymǵa tartý máselesin júıeli sheshý úshin eki zań jobasyn ázirlep usyndy. Olar jer qatynastaryn sıfrlandyrý, sondaı-aq paıdalanylmaıtyn aýyl sharýashylyǵy jerlerin tekserý kezeńderi men qaıtaryp alý merzimderin 2 jyldan 1 jylǵa deıin qysqartýdy kózdeıdi.
Zańǵa engiziletin ózgerister - jer zańnamasyn jetildirýge, jer ýchaskelerin berý tártibiniń rásimderin jeńildetýge, jer qatynastary salasyndaǵy qyzmetterdi sıfrlandyrý arqyly halyqtyń memleketpen ózara is-qımylyn qysqartýǵa baǵyttalǵan.
