Erejede jer ýchaskelerin ıgerý, onyń ishinde buǵan deıin alynǵan oń sheshimder men ruqsat qujattardy durys paıdalaný qarastyrylǵan.
Erejeniń negizgi tarmaqtary qalany damytýǵa arnalǵan qala qurylysy talaptaryn bekitýge baǵyttalatyn bolady. Sonymen qatar, tarıhı ǵımarattardy saqtaý jáne osy aımaqtarda qurylysty retke keltirý (aımaqtandyrý) maqsatynda erekshe qala qurylysyn aımaǵy belgilenedi.
Munda Tarıhı ortalyqtyń shekaralaryn anyqtaý mańyzdy. Sondaı-aq, qalanyń basqa aýdandaryndaǵy jekelegen aımaqtar da Erejede qarastyrylǵan mysaly, yqshamaýdandar men tynysh aýdandar.
Sondaı-aq, tarıhı mańyzy bar nysandardy anyqtaý da qarastyrylǵan, olardyń janynan kez kelgen qurylysty júrgizý qoǵamdyq talqylaýdan keıin ǵana múmkin bolady.
Qala qurylysyn erekshe retteý aımaqtarynda ǵımarattardyń tyǵyzdyǵy men bıiktigi eskeriledi. Mysaly, jańa ǵımarattyń bıiktigi irgeles salynǵan nysannan 1/3 bıik bolmaýy tıis. Budan ózge, erejelerde aerasııa rejımin jaqsartý, kógaldandyrý, qalalyq ortany saqtaý men jaılylyǵyn arttyrý talaptary jazylady. Tarıhı kelbetti saqtaý úshin ǵımarattar men qurylystardyń qasbetterine qoıylatyn talaptar da eskeriledi.
Qala turǵyndaryn, qoǵam belsendiler men sarapshylardy keńinen tarta otyryp, qoǵamdyq talqylaý ótkizý tetikterin ázirleý mańyzdy.
Júrgizilgen saraptamalar men turǵyndardyń pikirin jınaqtaý barysynda tarıhı ortalyq aýmaǵynda 36 jer teliminiń jeke menshikte ekeni anyqtaldy. Bul ýchaskeler eki topqa bólindi: qurylys bastalǵan jáne bos jatqan jerler. 14 ýchaskede qurylys bastalǵan, onyń ishinde 3 nysannyń qurylysy toqtatyldy ári ruqsat qujattary qaıtaryldy. Turǵyndardyń ótinishteri boıynsha 11 nysanǵa usynym berildi, munda qozǵalys syzbasyn uıymdastyrý, abattandyrý, qabattar sany jáne taǵy basqa máseleler eskerilmek.
Bos jatqan jer telimderi boıynsha, onyń ishinde 8 ýchaskeni qaıtarý (satyp alý) qarastyrylýda, munda abattandyrylǵan jáne kógaldandyrylǵan qoǵamdyq keńistikter qurylady. 14 ýchaskege jasyl jelekterdi kesýge tyıym salý, burynnan bar nysandardy eskere otyryp, qabattar sanyn jáne fýnksıonaldy paıdalanýdy azaıtý boıynsha qala qurylysyn júrgizýge shekteý qoıyldy.
