Prezıdent • 05 Qańtar, 2021

Ulttyq múddeni aspen de, taspen de qorǵaýǵa daıyn bolýymyz qajettigin taǵy da aıtqym keledi

1014 ret kórsetildi

Bul týraly Memleket basshysy Qasym-Jomart Toqaev el gazetinde jarııalaǵan «Táýelsizdik bárinen qymbat» atty maqalasynda aıtty. Sondaı-aq Prezıdent Qazaqstan shekarasyna baılanysty pikir bildirdi, - dep habarlaıdy Egemen.kz

Memleket basshysy egemendigimizdiń máńgilik úshtaǵany – Altaıdan Atyraýǵa, Alataýdan Arqaǵa deıin keń kósilgen baıtaq jerimiz, ananyń aq sútimen boıymyzǵa daryǵan qasterli tilimiz jáne barlyq qıyndyqtardan halqymyzdy súrindirmeı alyp kele jatqan bereke-birligimiz ekenin alǵa tartyp, biz osy úsh qundylyqty kózdiń qarashyǵyndaı saqtaıtynymyzdy basa aıtty.

«Babalardan mura bolǵan qasıetti jerimiz – eń basty baılyǵymyz. Qazaqqa osynaý ulan-ǵaıyr aýmaqty syrttan eshkim syıǵa tartqan joq. Búgingi tarıhymyz 1991 jylmen nemese 1936 jylmen ólshenbeıdi. Halqymyz Qazaq handyǵy kezinde de, odan arǵy Altyn Orda, Túrik qaǵanaty, Ǵun, Saq dáýirinde de osy jerde ómir súrgen, ósip-óngen. Qysqasha aıtqanda, ulttyq tarıhymyzdyń tereń tamyrlary kóne zamannyń ózeginde jatyr. Jalpy, tarıhpen saıasatkerler emes, tarıhshylar aınalysýy kerek», - dedi Prezıdent. 

Qasym-Jomart Toqaev  shekara máselesin sheshýmen naqty aınalysyp jatqan kezde keıbir saıasatkerler men qoǵam qaıratkerleri «biz buǵan asyqpaıyq», «keıin de kelisýge bolady» dep arqany keńge salǵysy kelgenin de eske salyp ótti.

«Kelissózderdi tabandylyqpen júrgizip, irgemizdi dereý qymtap alǵanymyz óte durys bolǵanyn ýaqyttyń ózi dáleldep berdi. Qazir kim ne aıtsa da, bizdiń ekijaqty kelisimdermen bekitilip, halyqaralyq deńgeıde tanylǵan shekaramyz bar. Endi oǵan eshkim daýlasa almaıdy», - dedi Memleket basshysy.

Sondaı-aq Prezıdent aýmaqtyq tutastyǵymyzǵa kúmán keltirip, tatý kórshilik qatynastarǵa syna qaqqysy keletin keıbir shetel azamattarynyń arandatýshylyq is-áreketterine resmı jáne qoǵamdyq deńgeıde toıtarys bere otyryp, aǵartýshylyq jumystaryn ustamdylyqpen júrgizgen jón ekenin aıtty.

Sońǵy jańalyqtar

Uqsas jańalyqtar