«Qurylys júrgizip, ınjenerlik jelilerdi tartý barysynda jaýyn-shashyn kárizderi men kollektorlardy da umytpaǵan jón. Olardy tazartyp, qaraýsyz qalǵan jaýyn-shashyn kárizderi men aryq júıesin balansqa alyp, jaýyn-shashyn qubyrlaryna zańsyz jalǵanýdy anyqtap, t.s.s. jumystardy josparly túrde júrgizý kerek.
Jarty jyl ishinde ótkizý qabiletin jaqsartý maqsatynda 54 shaqyrym kollektor, 4 myń qaq sýyn jınaý jáne qadaǵalaý qudyǵy, 32 myń pogometr aryq júıesi tazartyldy. Aryqtar men qudyqtardan shyǵarylǵan qoqystyń ózi 2,5 myń tonnany qurady, jasalǵan mundaı jumystar jetip-artylady. Jaýyn sýy aǵatyn qubyrlarǵa 230 úı-jaıdyń zańsyz jalǵanǵany anyqtaldy. Bul jumystar turaqty atqarylyp keledi», dep jazdy Altaı Kólginov.
Ol sózin jalǵaı otyryp, «Jastar» aýdanyndaǵy, ıaǵnı Táshenov pen Amman kósheleriniń qıylysyndaǵy tazartý qondyrǵysynyń qurylysy jaýyn-shashyn kollektorlarynyń rekonstrýksııasyn da kózdeı̆tinin aıryqsha atap ótti. Aıtýynsha bul joba eki kezeńde júzege asyrylatyn bolady.
«Búgingi aralaý barysynda «Jastar» aýdanyndaǵy (Táshenov pen Amman kósheleriniń qıylysy) tazartý qondyrǵysynyń qurylysymen tanystym. Bul qurylys kelip turǵan jaýyn-shashyn kollektorlarynyń rekonstrýksııasyn da kózdeıdi. Bul jobany biz eki kezeńde júzege asyramyz.
Birinshi kezeńi - byltyrǵy kúzde bastaldy. Buryn qaldyq sý ózenge tikeleı aǵyzylyp, ony lastap, qala ekologııasyna keri áserin tıgizetin. Josparymyz júzege asqan soń, endi jańbyr men qar sýy Esilge aǵyzar aldynda tazartylatyn boldy», — dedi qala ákimi.
Altaı Kólginov bıylǵy kóktemde bul jospardyń ekinshi kezeńi aıaqtalatynyn atap ótti.
«Nátıjesi — kelip turǵan jaýyn-shashyn kollektorlarynyń rekonstrýksııasy bolmaq. Jańa qondyrǵylardyń qýaty táýligine 42 myń tekshe metr bolady. Bul qondyrǵylar Táshenov, Baraev, Ýálıhanov, Imanbaeva jáne Respýblıka dańǵylyn sýǵa ketýden saqtaıdy.
Qondyrǵylar jer astymen júrgizilip, al ústine - kishi arhıtektýralyq músindermen kómkerilgen ári jasyl jelekti skver salamyz.
Sonymen birge, B. Momyshuly kóshesindegi aıtýly problemaly jerge jaýyn-shashyn káriz júıesiniń magıstraldyq kollektorynyń qurylysy aıaqtaldy. Jańa qondyrǵy qazirgi jaýyn-shashyn kárizderiniń ótkizý qabiletin 1,5 esege arttyrady», — deıdi ákim.
Al Telman turǵyn alabynyń tazartý qondyrǵylary men magıstraldy kollektorynyń ótkizý qabileti táýligine 36 myń tekshe metr bolmaq.
«Joba júzege asqan soń - osy alaptyń jáne № 27 kósheniń qurylys júrýi múmkin aýmaqtarynan qaq sýyn aǵyzyp áketý múmkin bolady. Buǵan qosa, birshama tazartý qondyrǵylary men jaýyn-shashyn kárizderi basqa jerlerge de salyndy. Bul jumystar júıeli túrde júrgizilip keledi», dep jazdy Altaı Kólginov.
