Senatorlar Ortalyq dárigerlerimen kezdesý barysynda medısınalyq qyzmettiń sapasyn arttyrý úshin aýrýhanany jabdyqtaý máselelerin talqylady. Odan bólek, maman tapshylyǵy, dáriger-neantolog, balalar arıtmology sııaqty mamandyqtardy tańdaıtyn bolashaq dárigerlerdi yntalandyrý máseleleri de sóz boldy.
«Osy jyldyń basynan bastap medısına qyzmetkerleriniń jalaqysy kezeń-kezeńmen kóbeıtiledi. Buǵan deıin Memleket basshysy dárigerler men sanıtarııa-epıdemıologııa salasy qyzmetkerleriniń jalaqysyn 2023 jylǵy deıin ekonomıkadaǵy ortasha jalaqydan 2 eseden joǵary deńgeıge kezeń-kezeńmen ósirýdi tapsyrdy», – dedi Nurlan Ábdirov.
Sonymen qatar Senat depýtattary Qazaq ulttyq agrarlyq zertteý ýnıversıtetinde boldy. Ol jerde senatorlar agrarlyq sala mamandarymen birge aýylsharýashylyq óndirisine IT-tehnologııany engizý jáne óndiriste ǵylymı ınnovasııany qoldaný máselelerin talqylady. Sondaı-aq, ınvestısııa tartý jáne aýyl sharýashylyǵy úshin bilikti mamandar daıarlaý isin damytý boıynsha Prezıdent anyqtap bergen mindetti iske asyrý jaıyn sóz etti.
«Senat aýyldyq jerlerdi, shaǵyn jáne orta kásipkerlikti damytýǵa arnalǵan parlamenttik tyńdaý ótkizdi. Sonyń barysynda biz aýyldardy jáne ol jerde bıznesti damytý máselelerin talqyladyq. Tyńdaý qorytyndysy boıynsha Úkimetke, salalyq mınıstrlikterge jáne «Atameken» ulttyq kásipkerler palatasyna tıisti usynymdar joldandy. Agrarlyq salaǵa qatysty búgin aıtylǵan máselelerdi de biz aldaǵy jumysymyzda eskeretin bolamyz», – dedi Palata vıse-spıkeri.
Sapar aıasynda senatorlar Nıderlandynyń Vagenıngen ýnıversıtetimen jumys jónindegi ınstıtýttyń jáne Fransııanyń Monpele ýnıversıtetimen birlesken Sút jáne sút ónimderiniń referenttik zerthanasynyń ashylý rásimine qatysty. Mundaı ınnovasııalyq ortalyqtar otandyq mamandar daıarlaý isine jáne ǵylymı jobalardy nátıjeli júrgizýge tyń serpin beredi.
Nysandardy aralaý barysynda Senat Tóraǵasynyń orynbasary Nurlan Ábdirov agroónerkásiptik keshenniń túrli baǵyttary boıynsha 49 zertteý zerthanasynyń jáne elimizdiń agrosektoryna engizilip jatqan 18 halyqaralyq jobanyń jumysymen de tanysty.
