– Qazaqstandaǵy Parlament Májilisine depýtattarynyń saılaýyna táýelsiz baıqaýshy retinde qatysý – biz úshin úlken abyroı. Qazaqstan bizdi ádettegideı jyly qabyldady. Jergilikti halyqtyń da Ýkraınaǵa degen qurmetin baıqadyq, – dedi Evgenıı Shevchenko.
Ýkraına Joǵary Radasynyń depýtaty birneshe saılaý ýchaskesin aralap shyqqanyn málimdedi.
– Jalpy alǵanda Qazaqstandaǵy demokratııalyq prosestiń qundylyqtary joǵary. Saılaý ýchaskelerine kirip-shyǵý boıynsha eshqandaı shekteý joq. Adamdardyń da eldiń saıası ómirine jaýapkershilikpen qaraıtyny baıqaldy. Muny daýys berýge aǵylǵan halyqtyń nópirinen-aq ańǵarýǵa bolady. Ádette saılaýdyń alǵashqy saǵattarynda mundaı belsendilik óte sırek oryn alady, – dedi Evgenıı Shevchenko.
Ýkraınalyq baıqaýshylar Qazaqstanǵa beısenbi kúni kelgen eken. Olar juma kúngi úgit-nasıhat jumystaryn baqylaýǵa tyrysqan.
– Úgit-nasıhat naýqanynyń sońǵy kúninde qala kóshelerinen anaý aıtqandaı belsendilik baıqalmady. Jergilikti telearnalardy qarap úlgermedik. Tynyshtyq kúninde de tıisti talaptardyń oıdaǵydaı saqtalǵanyna kýá boldyq. Ýkraınada tynyshtyq kúniniń ózinde astyrtyn úgit-nasıhat jumystary jalǵasyp jatady. Qazaqstanda mundaı jaǵdaıdy kórmedik. Jalpy, qazaqstandyqtar – tártipti, jaýapkershilikti joǵary qoıatyn halyq. Bul qasıetterdi kez kelgen isten baıqaýǵa bolady. Bul jaqsy, árıne. Qazaqstan halqynan alatyn úlgi-ónegeniń biri osy, – dedi "Ýkraına-Qazaqstan" parlamentaralyq yntymaqtastyq tobynyń jetekshisi.
Ýkraınalyq baıqaýshylar saılaý ýchaskeleriniń birinde reseılik áriptesterimen kezdesip qalǵanyn aıtty. Olar da saılaý barysynyń zań buzýshylyqtarynsyz ótip jatqanyn jetkizgen.
– Iá, áleýmettik araqashyqtyqty saqtaý boıynsha kishigirim kemshilikterdi kórdik. Biraq buǵan túsinistikpen qaraý kerek jáne mundaı kemshilikter saılaýdyń ótý barysyna eshqandaı kedergi keltirip otyrǵan joq. Atap óterligi, memleket esebinen saılaýshylardyń bárine betperde men qorǵanysh qolǵaptary usynylýda. Bul Qazaqstannyń saılaýǵa tynǵylyqty daıyndalǵanyn kórsetedi, – dedi Evgenıı Shevchenko.
