Jańa joldar sapasy syn kótermeıdi

Respýblıkanyń barlyq ob­ly­synda fılıaldary bar qu­rylymnyń negizgi mindeti – avtomobıl joldaryn salý, qaıta jańartý, jóndeý jáne kútip ustaý kezindegi jumystar men materıaldardyń sapasyn saraptaý, jol aktıvterin basqarý. Fılıaldar zerthanalary jol-qurylys materıaldarynyń sapasyn tekserýge arnalǵan za­ma­naýı qural-jabdyqtarmen jáne normatıvti tehnıkalyq qu­jattarmen qamtamasyz etilgen. Ortalyq respýblıkalyq mańyzy bar joldardy ǵana emes, sonymen qatar jergilikti mańyzy bar joldar, kópir qurylystary men kóshelerdi salý jáne jón­deý kezinde jumystar men materıal­darǵa saraptama júrgizedi.

Jýyrda ortalyqtyń Qy­zylor­­da oblystyq fılıaly bas­­shysy Erbolat Kóshtaev pen zerthana meńgerýshisi Erjan Ýsmanov BAQ ókilderine ótken jyly atqarylǵan jumystardy baıandap, negizgi máselelerge toq­taldy.

«Jol aktıvteriniń ulttyq sapa ortalyǵy» RMK Qyzylorda oblystyq fılıaly byltyr oblystyq jolaýshylar kóligi jáne avtomobıl joldary bas­qarmasymen, qalamen jáne jeti aýdanmen 21 kelisimshart jasaǵan. Sonyń negizinde tapsyrys berýshilermen birlese oty­ryp salynyp jatqan joldar sapasyna baqylaý júrgizipti.

– Byltyr respýblıkalyq ma­ńyzy bar joldardy ishinara tekserý barysynda 77 synama alynyp, 7 jol qurylys materıa­ly normatıvtik qujattar talap­taryna saı bolmaı shyqty. As­paptyq tekserý barysynda taǵy 10 kemshilik anyqtaldy. Qazir olar tolyq jóndeldi, – dedi «Jol aktıvteriniń ulttyq sapa ortalyǵy» RMK oblystyq fı­lıa­lynyń dırektory Erbolat Kóshtaev.

Jergilikti mańyzy bar avto­mobıl joldary men eldi me­ken­derdegi, qala kóshelerindegi júrgizilgen jumystarǵa jáne qoldanylatyn materıaldar sapasyna júrgizilgen saraptama da kóp olqylyqty anyqtaǵan. Ishinara tekserý barysynda 1 205 synama alynyp, zerthanada júrgizilgen synaq nátıjesinde onyń 614-i talapqa saı emestigi anyq bolǵan. Aspaptyq tekserý barysynda­ da júzden astam kemshilik baıqal­dy. Eń qyzyǵy, tapsyrys berý­shiler men merdigerlerge 71 hat joldansa da, anyqtalǵan aqaý­lar áli tolyq ornyna kel­gen­ joq. «Jol aktıvteriniń ult­tyq sapa ortalyǵy» RMK fı­lıalynyń zerthana meń­ge­rý­shisi Erjan Ýsmanov eskertýdi elemeıtinderdiń biri Aral men Qazaly aýdandaryn jal­ǵas­tyratyn «Jańaqurylys – Be­karystan bı» baǵytyndaǵy joldy salyp jatqan merdiger ekenin atap ótti. Byltyr osy jolǵa Sybaılas jemqorlyqqa qar­sy is-qımyl agenttiginiń Qy­zylorda oblysy boıynsha departamenti mamandarymen birlesip tekserý júrgizilgen. Son­da alynǵan 26 synamanyń on altysy kúre jol qurylysynda kóp kemshilik baryn kórsetken edi. Biraq merdiger tarapynan áli kúnge sol olqylyqtardyń jónge kelgeni jaıly habar joq.

Salynyp jatqan joldarǵa qatysty ortaq kemshilik – qa­lyń­­dyǵynyń qalyptaǵydan kemdigi, eniniń tarlyǵy men tyǵyzdaý koef­fısentiniń oıda­ǵydaı oryn­­dalmaýy. Osy­dan kelip ja­ńa jol aı aınalmaı jatyp oıdym-oıdym bolyp shyǵa keledi.

E.Kóshtaev búginde jol salý­ǵa qyrýar qarjy bólinip, múm­kindigi men mamandary bar kompanııa da, on ekide bir saımany joq seriktestikter de qurylysqa qumbyl kirisip ket­kendigin aıtady. Qurylys normalary erejesine sáıkes asfalt tóseý kúzdiń salqyny se­zilgennen bastap toqtaýy kerek. Biraq aqshaǵa qunyqqandar oǵan da qarap jatqan joq.

Jol qurylysy sapasyn tapsyrys berýshiniń tenderin utyp alǵan tehnıkalyq qadaǵalaýshy jiti baqylap, kúndelikti ju­mystyń basynda bolyp, ketken kemshilikterdi ýaqytynda es­kertýi tıis. Biraq qazir buǵan da nazar aýdaryp otyrǵandar az. Osynyń kesirinen joldyń sa­paǵa saı emestigi kóbine salynyp bitkennen keıin ǵana belgili bolady. Osydan da mamandar tehnıkalyq qadaǵalaýshylar jaýapkershiligin kóterý qajet­tigin aıtyp otyr.

QYZYLORDA