Mınıstrdiń aıtýynsha, atalǵan kezeńde munaı jáne kondensat óndirý kólemi 85,7 mln tonnaǵa jetti. Respýblıka boıynsha munaı óndirý 90 mln tonnadan 85,7 mln tonnaǵa deıin tómendetildi. Koronavırýstyń taralýyna jáne kóptegen elderdegi qatań shekteý sharalaryna, álemde munaı men munaı ónimderin tutynýdyń tómendeýinen, ekonomıkalyq belsendiliktiń tómendeýi saldarynan álemdik munaı qoımalarynyń tolyp ketý táýekelderine baılanysty 2020 jyly Úkimet munaı óndirý boıynsha shekteý sharalaryn iske asyrdy.
Sonymen qatar OPEK+ uıymyna múshe elder munaı óndirýdi shekteý boıynsha osyndaı sharalardy qabyldady.
«Atalǵan sharalar arqasynda álemdik munaı naryǵynda usynys pen suranys tepe-teńdigin birtindep qalpyna kelýi baıqalady, munaıdyń baǵasy bir barrel úshin 18 dollardan 50 dollarǵa deıin ósti», — dedi N. Noǵaev.
Sonyń ishinde, munaı-gaz salasyndaǵy iri kompanııalar boıynsha kórsetkishter tómendegideı: Teńizshevroılda atalǵan kezeńde 26,4 mln tonna munaı óndirildi, bul esepti jyldyń josparyna 100% quraıdy. Soltústik Kaspıı jobasynda munaı óndirý kólemi – 15,1 mln tonna, ıaǵnı 2020 jyldyń jospary 100% oryndaldy. Qarashyǵanaqtyń kórsetkishi 12 mln tonnany qurap otyr, 2020 jyldyń josparymen salystyrǵanda 103% kórsetti. Esepti kezeń ishinde 68,5 mln tonna munaı eksporttaldy, bul esepti jyldyń josparymen salystyrǵanda 101,8% oryndalǵan. 2020 jyldyń qorytyndysy boıynsha 55,2 mlrd tekshe metr kóleminde gaz óndirildi, bul esepti kezeńniń josparymen salystyrǵanda 100% qurady. Taýarlyq gazdy ishki tutyný kólemi 17,2 mlrd tekshe metrge jetti, osy kórsetkish ótken jyldyń 12 aıynyń josparyna 104,2% oryndaldy. Suıytylǵan munaı gazyn óndirý kólemi 3,2 mln tonna quraıdy.
Eksportqa shyǵarylǵan gaz kólemi 10,7 mlrd tekshe metr, bul josparmen salystyrǵanda 102% quraıdy. Mınıstrdiń aıtýynsha, ótken jyldyń 12 aıynyń qorytyndysy boıynsha 11,53 mln tonna munaı ónimderi óńdirildi. 4,48 mln tonna benzın, 4,55 mln tonna dızel otyny, 2,1 mln tonna mazýt, 38 myń tonna áýe otyny, 1 mln tonna bıtým óndirildi.
«Búgingi tańda ishki naryq elimizde óndirilgen munaı ónimderimen tolyq qamtamasyz etilgen», — dedi N. Noǵaev.
Munaı-gaz-hımııa ónimderine toqtalatyn bolsaq, onyń kólemi 359,3 myń tonnaǵa jetti, bul 103% qurady. Esepti kezeńde 108 mlrd kVt/saǵat elektr energııasy óndirildi. Osy kezeńde iri apattyq jaǵdaılar tirkelgen joq. 2020 jyldyń qorytyndysy boıynsha 19,5 myń tonna ýran óndirildi, bul esepti jyldyń josparyna 101% quraıdy.
«Dúnıejúzilik energetıka salasynda jańartylatyn energetıka álemdik trendke aınalýda. Qazaqstanda jańartylatyn energetıka «jasyl» ekonomıkany damytýdyń lokomotıvi. Biz «jasyl» ekonomıka tujyrymdamasynda ózimizge alǵan mindettemelerdi oryndadyq jáne eldiń jalpy energııa teńgerimindegi jańartylatyn energııa úlesin 3%-ǵa deıin jetkizdik», — dedi N. Noǵaev.
2020 jyldyń qorytyndysy boıynsha jańartylatyn energetıka obektileri óndirgen elektr energııasynyń kólemi 3,15 mlrd kVt/saǵatty qurady, bul 2020 jyldyń josparyna 100%. 2020 jyly jıyntyq qýaty 583 MVt 25 JEK jobasy iske asyryldy (10 JES, 12 KES, 1 SES, 2 BıoES). Bul sektorǵa $1,5 mlrd kóleminde ınvestısııa tartyldy. 3000-ǵa jýyq ýaqytsha jumys oryndary, sondaı-aq 1310-ǵa jýyq turaqty jumys oryndary quryldy. Bıyl qýattylyǵy 391 MVt bolatyn 23 obektini iske asyrý josparlanyp otyr. Jalpy ınvestısııa kólemi $370 mln quraıdy.
