«Qamqor» baǵytynda uıymdastyrylǵan bul is-sharaǵa mektepterdegi jastar úlken úles qosty. Sonymen qatar qalada ataýly kún aıasynda is-shara uıymdastyrylyp, volonterlik qyzmetti damytýǵa úles qosqan 20-dan astam jas arnaıy nomınasııamen marapattaldy.
Oblys ortalyǵyndaǵy eriktiler bilim baǵyty boıynsha uıymdastyrylatyn sharalardy da umyt qaldyrǵan joq. Bıyl mektep bitirýshiler úshin UBT pánderi boıynsha daıyndyq sabaqtary ótti. Aýdan jastary da túrli baǵytta bastama kóterip, eldik iske erekshe úles qosyp keledi. Mysaly, Shıeli aýdany jastary tótenshe jaǵdaılar, №13 órt sóndirý bólimi, №16 órt sóndirý beketi qyzmetkerlerimen birigip, turǵyndarǵa «Turmystaǵy órt qaýipsizdigi», «Kómirqyshqyl gazynan ýlanýdan saqtaný», «Sirińke – balalar oıynshyǵy emes» taqyryptarynda úgit-nasıhat jumystaryn júrgizdi. Aksııa aıasynda 6 040 úıdi aralap, 8 723 únparaq taratty. Jalaǵashtyqtar da janashyrlyq tanytatyn sharalardan syrt qalǵan joq. Jyl basynan beri aýdanda 65 qaıyrymdylyq aksııasy uıymdastyrylyp, 1 325 adamǵa 28 mln 500 myń teńgeniń kómegi kórsetilgen. Jýyrda áleýmettik jaǵynan az qamtylǵandarǵa, asyraýshysynan aıyrylǵan qarttarǵa, turmysy tómen 120 otbasyna 2 mln 305 myń teńgege otyn men azyq-túlik jetkizilip berildi.
Qyzylorda oblysy
