Aýany lastaıtyn avtokólikterge salynatyn aıyppul kólemi artady

QR Ákimshilik quqyq buzýshylyq týraly kodeksine (334 bap) engizilgen ózgeristerge sáıkes, shyǵaryndylardaǵy lastaýshy zattardyń mólsheri belgilengen normatıvterden assa, jeke kólik ıesi 10 aılyq, zańdy tulǵalar 100 aılyq eseptik kórsetkish mólsherinde aıyppul tóleıdi. Al buzýshylyq bir jyl ishinde qaıtalansa - jeke tulǵalarǵa 20, zańdy tulǵalarǵa 200 AEK aıyppul salynady. Jańa norma shilde aıynda kúshine enedi. Al ázirge qoldanystaǵy zańnamaǵa sáıkes jeke tulǵalarǵa eskertý jasalady nemese 2, qaıtalanǵan jaǵdaıda 5 AEK qana aıyppul jazylady.

Sonymen birge óńirlerdiń ekologııalyq problemalaryn keshendi sheshý boıynsha Jol kartalary qabyldanǵanyn, atalǵan qujattarda avtokólik shyǵaryndylaryn azaıtý baǵytynda atqarylatyn is-sharalar da qarastyrylǵanyn atap ótkimiz keledi. Mysaly, Nur-Sultan qalasynyń Jol kartasyna sáıkes, tehnıkalyq baıqaý ortalyqtaryna qoıylatyn talaptar qatańdatylady. Buryn tehbaıqaý pýnktterin ashqysy keletin kásipker ol týraly tek habarlaýǵa tıis bolsa, endi arnaıy ruqsat alýy tıis. Mundaı ortalyqtarǵa biryńǵaı baǵdarlamalyq qamtamasyz etý de engiziledi. Saqtandyrý polısin alý kezinde tehnıkalyq baıqaýdan ótý mindettemesi júkteledi. Sonymen qatar tehbaıqaý operatorynyń qyzmetin toqtata otyryp, mindetti tehnıkalyq baıqaýdy uıymdastyrý jáne ótkizý qaǵıdalaryn buzǵany úshin ákimshilik aıyppuldardy ulǵaıtý da qarastyrylǵan.

Atap óteıik, elimizde ekologııalyq talaptarǵa sáıkes kelmeıtin avtokólikter tehbaıqaý kezinde, Ekologııa departamentteriniń Ishki ister basqarmasymen nemese kóliktik baqylaý organdarymen birlesken reıdteri barysynda jáne kásiporyndarǵa júrgiziletin profılaktıkalyq tekserý kezinde anyqtalady. Avtokólikten shyǵatyn lastaýshy zattar normatıvteriniń saqtalýyn Ekologııa departamentteri gaztaldaǵysh «Avtotest», «Meta-01», t.b. ólsheý quraldary arqyly tekseredi.