Ortalyq kommýnıkasııalar qyzmeti alańynda Densaýlyq saqtaý vıse-mınıstri, Memlekettik bas sanıtarlyq dáriger Erlan Qııasov eldegi epıdemııalyq ahýal jóninde baıandap, sońǵy málimetterden habardar etti. Onyń aıtýynsha, 13 qańtardaǵy jaǵdaı boıynsha KVI-men aýyrǵan 164 477 naýqas jáne KVI teris nátıjeli 46 499 naýqas tirkeldi. Naýqastardyń 87%-y saýyǵyp shyqty. Búginde aýrýhanalarda – 5 732 naýqas, al reanımasııada 357 naýqas jatyr.
«Qazir táýekeli ortasha aımaqta nemese «sary aımaqta» Almaty, Nur-Sultan qalalary, Soltústik Qazaqstan, Pavlodar, Atyraý oblystary tur. Sondaı-aq sońǵy aıda Batys Qazaqstan oblysy «jasyl aımaqtan» «sary aımaqqa» kóshirildi. Qalǵan óńirler – «jasyl aımaqta». Atyraý oblysynda syrqattanǵandardyń sany aıtarlyqtaı óskeni baıqalady, dálirek aıtqanda, 3,7 esege artqan. Bul kórsetkish boıynsha Almaty oblysynda 1,8 esege, Qaraǵandy oblysynda jáne Almaty qalasynda 1,5 esege, Mańǵystaý oblysynda 81-den 315 jaǵdaıǵa deıin, Túrkistan oblysynda 102-den 256 jaǵdaıǵa deıin, Shymkent qalasynda 150-den 195 jaǵdaıǵa deıin, Qyzylorda oblysynda 48-den 135 jaǵdaıǵa deıin aýrý juqtyrýdyń óskeni baıqalady», dedi E.Qııasov.
Memlekettik bas sanıtarlyq dárigerdiń qalyptasqan epıdemııalyq jaǵdaıdy eskere otyryp, karantındik sharalardy kúsheıtý boıynsha sharalar qabyldaý qarastyrylyp jatqanyn málimdedi. Sonymen qatar aýrýdy syrttan ákelý jaǵdaıy azaıar emes. 13 qańtardaǵy jaǵdaı boıynsha memlekettik shekarada 859 adamnan KVI anyqtaldy. Zerthanalardyń qýaty táýligine 100 myńǵa jýyq zertteý júrgizýge deıin artty.
«Qyrkúıek aıynda Anglııanyń ońtústik-shyǵysynda genetıkalyq joldaǵy kóptegen ózgeristerden turatyn vırýstyq genomdyq júıeleý arqyly koronavırýstyń jańa shtammynyń alǵashqy jaǵdaıy anyqtaldy. Búgingi tańda vırýstyń bul túri birneshe elde sonyń ishinde Aýstralııa, Danııa, Italııa, Islandııa, Nıderlandy, Reseı jáne basqa elderde anyqtalǵan. Aldyn ala málimetter boıynsha jańa shtamm vırýstyń basqa nusqalaryna qaraǵanda, jas popýlıasııalar arasynda belsendi taralady. Biraq bul qubylysty zertteý áli de jalǵasýda. Qazaqstanda vırýstyń bul túri anyqtalǵan joq. Vırýstyń aýa arqyly berilý mehanızmin eskere otyryp, ony elimizge ákelý qaýpin joqqa shyǵarýǵa bolmaıdy», dedi vıse-mınıstr.
Budan keıin tıisti vedomstvo ókili mektepterdegi oflaın oqýdyń jalǵasýyna baılanysty jýrnalısterdiń saýalyna jaýap berdi. Sonyń ishinde mektep ashanalarynyń jumysyna toqtaldy. Ashanalardy qolaıly epıdemııalyq aımaqtarda ornalasqan jekelegen aımaqtarda ashý josparlanyp jatyr eken. Sondaı-aq balalardyń qaýipsizdigin qamtamasyz etý jáne koronavırýs ınfeksııasyn juqtyrý qaýpin azaıtý úshin ashanalardy ashý algorıtmi egjeı-tegjeıli sıpattalady.
Sonymen qatar brıfıngte Medısınalyq jáne farmasevtıkalyq baqylaý komıteti tóraǵasynyń orynbasary Nurlybek Asylbekov vaksınalaýǵa daıyndyq barysy týraly aıtyp berdi. Onyń aıtýynsha, jumys toby shprısterdi daıyndaý, logıstıka, tasymaldaý jáne saqtaý máselelerin pysyqtaýda. Qazir «SK-Farmasııa» vaksınalardy kóptep ornalastyrýǵa bolatyn 4 hab daıyndady. Vaksınalardy júrgizý, saqtaý jáne tasymaldaý boıynsha ádistemelik usynymdar ázirlenýde. Josparlanǵan kólem boıynsha shprıster qory daıyndaldy.
