BQO Bilim basqarmasynyń basshysy Aıgúl Myńbaeva О́ńirlik kommýnıkasııalar qyzmeti alańyndaǵy brıfıngide málim etkendeı, qazirgi kezde oblysta oqytý shtattyq, aralas jáne qashyqtan júrgizilýde.
Onyń aıtýynsha, óńirde 111 132 shákirti bar 379 mektep jumys isteıdi. Mektepterde sanıtarlyq qaýipsizdik talaptaryn qatań saqtaı otyryp, synyptarda 15 adamǵa deıin otyratyn, balalar sany 300-ge deıingi 256 mektepte 25881 bala (23,3 paıyz) - shtattyq, 110 mektepte 85239 bala (76,7 paıyz) aralas rejımde bilim alýda. Ata-analardyń ótinishine sáıkes 1 mektepte 12 bala (0,01 paıyz) qashyqtan oqytylýda. Vedomstvoaralyq komıssııanyń sheshimi boıynsha úshinshi toqsannan bastap 9 jáne 11-inshi (12) synyp oqýshylary aralas sıpatta bilim alady. Bul synyptarda matematıka, qazaq tili, orys tili, shet tili, fızıka, hımııa, bıologııa, algebra, geometrııa jáne tarıh pánderi, ıaǵnı barlyq pánniń 70 paıyzy mektepte oqytylady.
«Mektepterde ıkemdi sabaq kesteleri jasalyp, sabaqtar arasyndaǵy úzilister ártúrli synyptar úshin túrli ýaqytta uıymdastyrylady. Sondaı-aq áleýmettik qashyqtyqty saqtaý úshin aýysymdar sany kóbeıtilip, pánderdiń 30 paıyzy qashyqtan oqytylady. Mundaı sheshim ata-analar men kópshiliktiń pikirin eskere otyryp qabyldandy», dedi Aıgúl Myńbaeva.
Oǵan qosa túlekterdiń oqý jyly sońynda qorytyndy attestattaý, olardyń kolledjge túsý úshin keshendi emtıhan, JOO-ǵa túsý úshin UBT tapsyratyny eskerildi. Oqýshylardyń baǵdarlamadan artta qalý deńgeıin anyqtaý jáne ony teńestirý úshin konsýltasııalyq onkúndik uıymdastyrý jumystary bastaldy.
Ata-analar pikirin eskere otyryp, kezekshi synyptarda dástúrli sıpatta oqýǵa múmkindigi joq shákirtterge muǵalimderdiń qalaýy boıynsha jeke keńes beriledi. Dırektormen kezdesý, pedagogıkalyq keńes májilisi, ata-analar jınalysy jáne basqa is-sharalar qashyqtan ótedi.
«Kásiptik bilim boıynsha aıtsaq, 1-semestrde oblys boıynsha 1235 stýdenti bar 8 aýyldyq jáne jabyq mekemede (RÝ) ornalasqan kolledjder shtattyq rejımde jumys istedi. Ekinshi semestrden bastap 25 kolledjdegi 5376 1-kýrs stýdentteri aralas oqý formatyna (pánderdiń, modýlderdiń 70 paıyzy shtattyq, 30 paıyzy qashyqtan) kóshti. Bul kolledjderdegi 2-4 kýrs stýdentteri (10342 adam) qashyqtan oqýdy jalǵastyratyn bolady. Al óndiristik mashyqtan shtattyq rejımde ótedi. Kolledjderde oqytýǵa jáne mashyqtan ótýge óńirdegi epıdemııalyq jaǵdaıǵa baılanysty ózgerister engizilýi múmkin», dedi A.Myńbaeva.
