"102" qyzmetiniń habarlaýynsha, Almatyda jańa jyldyq merekeler tynysh ótken.
– 31-i kúni "102" pýltine 1 600 habarlama kelip tústi. Bul kúndegiden az. Olar negizinen aqparattyq, anyqtamalyq jáne turmystyq sıpattarǵa ıe boldy, atap aıtqanda azamattar kórshilerdiń shýyldaǵanyna, otshashýlardyń daýysyna shaǵymdandy. Jańa jyl merekesi qarsańynda, barlyq mereke kúnderi sııaqty Almaty qalasy PD Jedel basqarý ortalyǵy táýlik boıy jumys istedi. Eger azamattar demalyp jatsa, biz qyzmet atqardyq. Jańa jyl qarsańynda qyzmet etken bizdiń qyzmetkerler olarǵa qandaı jaýapkershilik júktelgenin túsinedi. Negizgi mindet – qoǵamdyq tártipti jáne azamattardyń qaýipsizdigin qamtamasyz etý bolyp tabylady. Negizinde, tún ádettegideı jumys rejıminde tynysh, eshqandaı ereksheliktersiz ótti. Qoǵamdyq tártipti óreskel buzý nemese qylmystar bolǵan joq, – dedi Almaty qalalyq PD Jedel basqarý ortalyǵynyń bastyǵy Andreı Kvashnın. Mereke kúnderi kúlkili jaǵdaılar da boldy.
– Bizge Jibek joly kóshesindegi Arbatta aıýlar júrgendigi týraly habarlama kelip tústi. Dereý beınebaqylaý kameralaryn Arbatqa baǵyttadyq, sol kezde onda panda kıimin kıgen toǵyz adamnyń júrgenin anyqtadyq. Olar oıyn-saýyq is-sharasynyń qatysýshylary bolyp shyqty. Jalpy Jańa jyl túni tynysh ótti. Tájirıbe kórsetkendeı, buryn Jańa jyl qalada keń kólemde toılanatyn. Bul joly Almatyda buqaralyq merekelik sharalar bolǵan joq, qoǵamdyq oryndarda kólikter men azamattar az boldy, dedi ol.
Sonymen qatar ol Jańa jylda bolǵan basqa da qyzyq jaǵdaılardy atap aıtty.
– Iri sýpermarketterdiń birinde mas kúıinde shalbaryna salyp vıskı bótelkesin alyp shyqpaqshy bolǵan jas jigit ustalǵan;
– Jeke úılerdiń birinde alkogoldik ishimdikter ishken birge turatyn azamattar Jańa jyldyń keıipkerlerin, ıanı kimniń Aıaz ata nemese Aqshaqar bolatynyn anyqtaý kezinde daýlasyp qalǵan;
– Almaty qalasynyń kópbalaly turǵyny jańa jyldyq syılyqtaryn taksıde umytyp ketken. Polısııa qyzmetkerleri tez arada jeke tasymaldaýshyny taýyp, umytyp ketken syılyqtardy Jańa jyl aldynda qaıtaryp berdi, jáne t.b.
