Prezıdent Qazaqstannyń memleket bolyp qalyptasýyndaǵy Elbasynyń dara kóshbasshylyǵynyń mańyzyna aıyryqsha toqtaldy.
Sonymen qatar Memleket basshysy sońǵy ýaqytta aýmaqtyq tutastyǵymyzǵa kúmán keltirip, tatý kórshilik qatynastarǵa syna qaqqysy keletin keıbir shetel azamattarynyń arandatýshylyq is-áreketterine de jaýap bere otyryp, bizdiń ekijaqty kelisimdermen bekitilip, halyqaralyq deńgeıde tanylǵan shekaramyzdyń bar ekenin basa aıtty. 2018 jyly Kaspıı teńiziniń quqyqtyq mártebesi týraly konvensııaǵa qol qoıylǵannan keıin qurlyqtaǵy ǵana emes, teńizdegi shekaramyz da birjola aıqyndalyp, túpkilikti sheshilgeni de belgili.
Sondaı-aq Prezıdent azamattarymyzdy kópten mazalap júrgen jer máselesi boıynsha da sóz qozǵap, qazaqtyń jeri eshbir sheteldiktiń menshigine berilmeıtinin taǵy da rastady.
Birlikti el buzylmas, sondyqtan memleketimizdi birtutas dep bilýimiz jáne tanytýymyz qajet. Ol úshin aımaqtarymyzdy soltústik, ońtústik, batys, shyǵys dep bóle bermeı, tarıhı, mádenı mańyzdy ataýlardy engizý de mańyzdy. Árıne, ony Memleket basshysy aıtqandaı, baıyppen, oılanyp júzege asyrý kerek.
Ár qazaq úshin atalarymyzdyń qany men teri tamǵan bir ýys topyraqtyń ózi – esebi joq baılyq. Alaıda bul jerdi durys paıdalaný, qadirin bilip qasterleý, shynaıy otansúıgishtikti qalyptastyrý – kezek kúttirmeıtin úlken jumys.
Jahandaný men aqparattyq damý zamanynda eldiń jat jurttyń ıdeologııalyq yqpalyna tez ilesip ketýi beleń alýda. Ásirese jastar bul qaýiptiń aldynda turǵany anyq. Buǵan tótep berýdiń joly – jańa zamanǵa saı bilim men básekege qabilettilikti, artyqshylyqtardy boıǵa sińirýmen qatar, tamyrymyzdy, ulttyq bolmysymyzdy berik saqtaý.
Aldaǵy tórtinshi onjyldyqtyń bizge júkteıtin mindeti – qýatty eldiń ıesi jáne kemel halyq bolý. Bul jolda saıası-ekonomıkalyq reformalardy jáne sanany jańǵyrtý úderisin jalǵastyryp, zaman talabyna beıimdelgen ulttyń jańa bolmysyn qalyptastyrýymyz qajet.
Ulttyń jańa bolmysy ótkendi bilýden, dáripteýden bastalady. Táýelsizdik qundylyǵy halqymyzdyń jadynda máńgi saqtalýy úshin óskeleń urpaq onyń qadirin bilýi kerek. Bul rette, tarıhı jadynyń orny erekshe. Táýelsizdigimizdiń 30-jyldyǵymen qatar, egemendikke jetkizgen qaıǵy-qasiretke toly tarıhı oqıǵalardy umytpaǵan jón. Mıllıondaǵan adamdy qazaǵa ushyratyp, tiri qalǵanyn jan saýǵalap bosyp ketýge májbúr etken alapat asharshylyqtyń alǵashqy kezeńi 1921-1922 jyldardaǵy náýbetten beri 100 jyl ótti. 1986 jyly ul-qyzdarymyzdy Keńes Odaǵynyń qaharynan qaımyqpaı, ult namysy úshin alańǵa shyǵarǵan Jeltoqsan oqıǵasyna da 35 jyl tolady. Bunyń bári – bizdiń tarıh. Memlekettiligimiz týraly bóten pikir aıtyp júrgenderdiń aýzyna qum quıý úshin myńdaǵan ǵasyrlarǵa sozylǵan tarıhymyzdyń, álemniń jartysyna ıe bolǵan alyp memlekettik qurylystyń, azattyq úshin soǵystardyń, batyrlar jyrlaryn, Alash qozǵalysynyń baǵdarlamalaryn, jalpy ult shejiresin jappaı qaıta qarap, ony óz elimizben qatar búkil álemge jańa aqparattyq tetikter arqyly pash etý – mańyzdy mindet.
El birliginiń, ult namysynyń ajyramas bóligi – ol til. Memleket basshysy qazaq tiliniń mártebesin erekshe aıtyp, memlekettik tildi kópshiliktiń úırenýi jónindegi óz úndeýin naqty jetkizdi. Memlekettik tildi bilý – ár azamat úshin paryz. Ol úshin elde barlyq jaǵdaı jasalýda, qalǵany ár adamnyń óz nıetinde. Nıettiń durys bolýy qazaq tilin meńgergisi keletin adamdarǵa da, osy maqsatqa jetýge jaǵdaı jasaıtyn Úkimetke de baılanysty.
Qazaqstannyń asqaq bolashaǵy úshin eldik saıasat, jasampaz patrıotızm, memlekettiń ıgiligi úshin kúndelikti eńbek pen ult birligi óte mańyzdy.
Mádına BEKTENOVA,
Prezıdent janyndaǵy QSZI áleýmettik-saıası zertteýler bóliminiń jetekshi ǵylymı qyzmetkeri
