Germanııanyń bıliktegi Hrıstıan-demokratııalyq odaǵy juma-senbi kúnderi jıyn ótkizip, jańa jetekshini tańdady. Vırtýaldy jıyn nátıjesi boıynsha, partııa jetekshiligine Armın Lashet saılandy. Endigi kezekte halyqty Soltústik Reın-Vestfalııa federaldy jeriniń premer-mınıstri, 59 jastaǵy saıasatkerdiń kansler laýazymyna keler-kelmesi alańdatady.
Lashettiń kandıdatýrasyna jıynǵa qatysqan 991 saıasatkerdiń 521-i qoldap daýys berdi.
Partııa basshylyǵyna úmitkerler qatarynda Frıdrıh Mers te boldy. Ol 466 daýys jınady. Úshinshi úmitker Norbert Rettgen ekinshi kezeńge óte almady.
Bul tańdaýdyń tartysty bolǵany sózsiz. О́ıtkeni Angela Merkel kezekti saılaýdan keıin úkimet basshylyǵyn da bosatatynyn habarlaǵan-dy. Kezekti saılaý dep otyrǵany 2021 jyldyń 26 qyrkúıegine josparlanǵan parlament saılaýy edi.
Partııa basshylyǵyna taǵaıyndalǵan Lashet quttyqtaý sózinde Hrıstıan-demokratııalyq odaǵy men olardyń áriptesi Hrıstıan-áleýmettik odaǵynyń birligi nyǵaıa túsip, seriktestigin alǵa jeteleý jolynda qyzmet etetinin habarlady. «Aldaǵy saılaýda kansler dál osy odaqtan tańdalýy úshin kóp eńbek etý qajet. Men eki odaq jumysy men birliginiń ilgerileýi úshin jumys isteımin», dedi partııanyń jańa basshysy.
Germanııa saıasatkerleri Lashettiń Merkel saıasatyn odan ári jalǵastyrady degen pikirin aıtady. О́ıtkeni ol da Merkel sııaqty tyń ári muqııat adam.
2018 jyly da saılaýǵa kandıdatýrasyn usynyp, jeńilis tapqan Mers bıyl taǵy baǵyn synady. Ekinshi aınalymǵa ótkenimen Lashetten az daýys jınap, partııa basshylyǵynan qur qaldy.
Nemis saıasatkerleri, áleýmettanýshylar men basylymdary birneshe aıdan beri partııaǵa jańa ári jas basshy kerek ekenin aıtyp kelgen-di. Olar Markýs Zederdiń bul laýazymǵa taptyrmas adam ekenin alǵa tartty. Olardyń oıynsha, bavarııalyq Hrıstıan-áleýmettik odaǵynyń kóshbasshysy koronavırýspen kúres kezinde qajyrly eńbek etip, pandemııa ýaqytynda halyqtyń áleýmettik jaǵdaıynyń jaqsarýyna kóp eńbek sińirgen. Osylaısha, ol Germanııadaǵy tanymal saıasatkerlerdiń birine aınaldy.
Osy oraıda Germanııadaǵy Infratest ortalyǵy halyq arasynda saýaldama júrgizip, keleshek kansler týraly boljam jasady. Saýaldamaǵa qatysqandardyń 55 paıyzy Zederdi qup kórse, 35 paıyzy Mersti, 34 paıyzy Rettgendi tańdaǵan. Al partııanyń jańa basshysy Lashetke nebári 27 paıyz adam senim artqan.
Negizi Zederdiń jeńiske jetýi ábden múmkin tańdaǵan. О́ıtkeni osy tartysqa túsken saıasatkerlerdiń barlyǵy ol týraly jaqsy pikirde. Degenmen kansler Angela Merkeldiń bul máseledegi oıy ázirge belgisiz.
Partııa basshysy Armın Lashet te Zederdiń kandıdatýrasyna qatysty oılanyp kórý kerek ekenin aıtty. Al Zederdiń ózi bul suraqqa naqty jaýap bermeı, qazirde ol úshin bavarııalyq úkimettiń jumysy birinshi orynda ekenin málimdedi.
Naqty sheshim aıtýǵa áli erte. О́ıtkeni joǵaryda jazǵanymyzdaı, HDO qyrkúıekke josparlanǵan saılaýda da osy ornyn saqtap qalýy kerek. Degenmen saýaldama nátıjesine qarasaq, halyqtyń partııaǵa kózqarasy oń sekildi.
Bıylǵy jıyn pandemııaǵa oraı erekshe ótti. Partııa basshysyn saılaý eki kezeńnen turdy. Alǵashqy aınalymda partııa músheleri áriptesterine kompıýterden onlaın rejimde daýys berse, ekinshi kezeńde poshta arqyly daýys jınaldy. Bul kúmán týdyrmas úshin tańdalǵan tásil bolatyn. Saıasatkerler jıyn úrdisine esh talas týdyrǵan joq.
