Birinshisi – ózbek aǵaıyndar ortasynda ósip-óngen qandasymyz Sabyr Rahımov 1943 jyly 19 naýryzda áskerı joǵary shen general-maıor ataǵyna qol jetkizse, ekinshi qazaq – Shákir Jeksenbaev 1943 jyly qazan aıynda, úshinshi qazaq – Mońǵolııa áýe kúshteriniń bas qolbasshysy Jaısanyp Múdárisuly 1944 jyldyń sáýir aıynda bul ataqqa ıe bolypty.
Osylardyń ishinde Batys Qazaqstan oblysy, Orda aýdany Shońaı aýylynda 1901 jyly dúnıege kelgen Shákir Jeksenbaıulynyń týǵanyna bıyl 120 jyl tolyp otyr.
Jýyqta Oral qalasyna barǵan saparymyzda oblystyq tarıhı-ólketaný mýzeıiniń kórme zalynda turǵan generaldyń kıtelin kórdik. Jibek matadan tigilgen áskerı mýndırdiń ıyǵynda general-maıor pogony jáne qaıyrma jaǵasynda altyn-bıdaı poshymdy aıyrym tańbasy tur. Sol jaq omyraýynda «Lenın» ordenimen qatar 4 márte ıe bolǵan «Jaýyngerlik Qyzyl Tý» ordeni jáne «Otan soǵysy», «Qyzyl Tý» ordenderiniń lentasy kóz tartady.
Mýzeı dırektorynyń orynbasary Ajar Berikqalıeva hanymnyń aıtýy boıynsha, bul jádigerdi general 1977 jyly 19 jeltoqsan kúni osy mýzeıge óz qolymen ákelip tapsyrǵan eken. О́ıtkeni bul jyly KSRO-nyń qurylǵanyna 60 jyl tolyp, dataly toı Odaq kóleminde keńinen atap ótilipti. Atalmysh mereke qarsańynda Máskeý qalasynda turatyn general atamyz jubaıy Nına Ivanovnamen birge Orda aýdandyq partııa komıtetiniń birinshi hatshysy, soǵys ardageri ári aqyn Rahmetolla Egizbaevtyń shaqyrýymen týǵan jerine kelgen. Dál osy saparynda joǵarydaǵy jádigerdi mýzeıge tapsyrǵan sııaqty.
Bul oqıǵanyń basy-qasynda júrgen, qazirgi tańda Oral qalasynda turatyn Jeksenbaevtyń nemere inisi, tehnıka ǵylymdarynyń doktory Ermek Aıtalıev, «generalǵa aýyldastary astyna at mingizip qurmet kórsetti, sonymen qatar aýdan ortalyǵynda halyqpen kezdesý uıymdastyrdy» deıdi. Osyndaǵy tarıhı sátten estelik retinde túsirilgen fotolar Ermek Sátpaıulynyń jeke qorynda saqtaýly eken.
