Sheteldikterdiń Qazaqstanda ýaqytsha turý merzimi uzartyldy

Qazaqstan • 18 Qańtar, 2021

Sheteldikterdiń Qazaqstanda ýaqytsha turý merzimi uzartyldy

10 ret kórsetildi

QR aýmaǵynda koronovırýs ınfeksııasynyń paıda bolýy men taralaýyna jol bermeý jónindegi vedomstvoaralyq komıssııa elimizde ýaqysha bolatyn sheteldikterdiń mártebesin zańdastyrdy, dep habarlaıdy Egemen.kz

Dınar KERIM

«IIM turaqty negizde elimizdegi kóshi-qon ahýalyn monıtorıngteıdi. Osy saladaǵy negizgi tapsyrma – sheteldikterdiń Qazaqstan Respýblıkasynyń zańnamasyn saqtaýyn jáne ruqsat etilgen merzimi aıaqtalǵan soń olardyń elden shyǵýyn baqylaý. Sonymen birge, koronovırýs pandemııasy Qazaqstanǵa keletin sheteldikterdiń ómir salty men josparyna birqatar túzetý engizdi. Tikeleı kólik qatynasynyń bolmaýy tranzıttik sapar úshin shekaralardy jabý, avıabıletter qunynyń ósýi faktileri kóptegen sheteldikterdiń Qazaqstannan belgilengen merzimde shyǵýyna múmkindik bermeıdi. Qalyptasqan jaǵdaıdy eskere otyryp, QR aýmaǵynda koronovırýs ınfeksııasynyń paıda bolýy men taralaýyna jol bermeý jónindegi vedomstvoaralyq komıssııa sheshim qabyldap, elimizde ýaqysha bolatyn sheteldikterdiń mártebesin zańdastyrýǵa jáne Qazaqstanda zańnamany buzbaýǵa múmkindik beredi», dedi QR IIM Kóshi-qon qyzmeti komıteti tóraǵasynyń orynbasary Sabyrjan Seıitjanov QR IIM uıymdastyrǵan onlaın brıfıngte.

Spıkerdiń aıtýynsha, negizgi aksent otbasymen qaýyshýǵa kelgen sheteldikterge, qujattarynyń jaramdylyq merzimi ótken azamattarǵa jáne eńbek mıgranttaryna jasalǵan.

Jol júrý qujattarynyń, sheteldiktiń elde turý yqtııarhatynyń, Qazaqstan Respýblıkasynyń vızalarynyń, elde ýaqytsha bolýdyń ruqsat etilgen merzimi ótip ketken nemese merzimi 2021 jylǵy 5 maýsymǵa deıin aıaqtalatyn sheteldikter men azamattyǵy joq adamdar ákimshilik jaýapkershilikke tartylmaı, elden shyǵýyna ruqsat berildi. Sheteldikterdiń azamattyǵy bar elimen nemese turaqty turatyn elmen tikeleı kóliktik qatynastar (avıa, avto jáne temir jol qatynastary, jaıaý) jáne tranzıttik jol júrý bolmaǵan jaǵdaıda sheteldikterdi jáne azamattyǵy joq adamdardy elden shyǵarý týraly sot sheshimi merziminiń oryndalýy toqtatyldy.

«Sheteldikterdiń elde bolý merzimi (vızalar, ýaqytsha turýǵa ruqsattar) 2021 jyldyń 5 maýsymyna deıin uzartylady. Eńbek etýge ruqsat nemese ózdiginen jumysqa turýǵa arnalǵan biliktilik týraly jergilikti atqarýshy organ bergen anyqtamasy barlarǵa vıza men ýaqytsha turýǵa yqtııarhat sheteldiktiń nemese azamattyǵy joq adamnyń elge kelý maqsatyn talap etpeı-aq beriledi. QR aýmaǵyndaǵy otbasymen qaýyshý maqsatymen júrgen jáne azamattyq elinen qujattardy usyna almaıtyndarǵa vıza sheteldiktiń nemese azamattyǵy joq adamnyń elge kelý maqsatynyń talap etpeı beriledi», dep túsindirdi S. Seıitjanov.

Ruqsat berý, uzartý, qaıta resimdeý týraly ótinishpen júgingen eńbek ımmıgrantyna «Kóshi-qon týraly» QR Zańynyń 43-1-baby 2-tarmaǵynyń talaptaryn eskerýsiz rásimdeledi (Eńbek ımmıgrantynyń QR aýmaǵynda úzdiksiz ýaqytsha maksımaldy turý merzimi on eki aıdan aspaýy tıis).

«Bul rette Qazaqstandaǵy ruqsat qujattarynyń merzimi ótken nemese ótip bara jatqan sheteldik azamattar quzyretti organdardaǵy óz quqyqtyq mártebesin ýaqytyly rettestirý úshin kóshi-qon qyzmetine júginýleri qajet. 2021 jyldyń 1 qańtarynan 5 maýsymyna deıingi kezeńde quqyqtyq mártebelerin zań júzinde rettemegen sheteldikterdiń quqyqtyq jaýapkershilikten bosatylmaıtynyn eskertemiz», dedi Sabyrjan Seıitjanov.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz