О́tken táýlikte quramynda ákimdiktiń jáne Taýarlar men kórsetiletin qyzmetterdiń sapasy men qaýipsizdigin baqylaý basqarmasynyń ókilderi bar mobıldi top karantın shekteýleriniń saqtalýyn qadaǵalaý boıynsha 139-ǵa jýyq kásipkerlik sýbektini tekserdi.
Tekseris júrgizý barysynda karantındi buzǵan jeti obekt anyqtaldy. Olardyń ishinde dúkender, kafe-barlar jáne spa salondar bar. Turan kóshesindegi meıramhanalardyń birinde «Qyz uzatý», ekinshisinde 50 jyldyq mereıtoı uıymdastyrylǵan.
Meıramhanalardyń zaldary qonaqtarǵa toly bolǵan jáne olar eshqandaı karantın sharalaryn saqtamaǵan. 50 jyldyq mereıtoıǵa shaqyrylǵan qonaqtar karantın sharalary men áleýmettik qashyqtyqty múldem saqtamaǵan. «Qyz uzatýǵa» kelgender bı kórigin qyzdyryp jatqan.
Is-sharaǵa qart adamdardan bastap balalarǵa deıin barlyq jastaǵy qonaqtar qatysqany anyqtaldy. Quqyq buzýshylarǵa qatysty jınaqtalǵan materıaldar QR ÁQBtK-niń 425-baby (Halyqtyń sanıtarııalyq-epıdemııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý) boıynsha ákimshilik jaýapkershilikke tartý úshin Taýarlar men kórsetiletin qyzmetterdiń sapasy men qaýipsizdigin baqylaý basqarmasyna joldandy.
18 qańtardan bastap áleýmettik qashyqtyqty jáne sanıtarlyq-profılaktıkalyq talaptardy saqtaý arqyly qoǵamdyq tamaqtaný nysandarynyń jumysyna saǵat 07:00-den 20:00-ge deıin (meıramhana, kafe-barlar jáne t.b.) ruqsat beriletinin eske salamyz.
Nur-Sultan qalasynyń Polısııa departamenti mekeme ıeleri men kelýshilerdiń beıqamdyǵy indettiń taralýyna alyp keletinin eskertedi.
