Stıpendııalyq baǵdarlama sheńberinde Majarstan Úkimeti qazaqstandyqtarǵa kelesi baǵdarlamalar boıynsha 250 grant usynady: bakalavrıat – 110 oryn, magıstratýra – 90 oryn, oqý merzimi 5 jyldan 6 jylǵa deıingi bakalavrıat jáne magıstratýra – 30 oryn, doktorantýra – 20 oryn. Grant kelesi shyǵyndardy qamtıdy: tegin oqý, aı saıynǵy stıpendııa, jataqhanada turý jáne medısınalyq saqtandyrý. Qalǵan shyǵyndardy grant ıegeri ózi óteıdi.
Konkýrsqa qatysý sharttary:
– bakalavr dárejesin alýǵa úmitkerler úshin – aǵymdaǵy jylǵy úlgerim tabelderimen qosa negizgi orta bilim týraly attestattyń/ kýáliktiń ortasha baly (2020-2021 oqý jylynyń mektep bitirýshileri úshin) / arnaıy orta bilim týraly dıplomnyń keminde 4,0 (5,0-den));
– magıstr dárejesin alýǵa jáne rezıdentýra men doktorantýrada oqýǵa úmitkerler úshin – bakalavr/maman dıplomynyń ortasha balynyń sáıkestigi keminde 3,0 (4,0/4,33-ten).
Konkýrstyq irikteý 2 kezeńnen turady: táýelsiz saraptaý komıssııasy ótkizetin áńgimelesý jáne qorytyndy komıssııanyń otyrysy. Táýelsiz saraptaý komıssııasy qujattardy qabyldaý merzimi aıaqtalǵan kúnnen bastap 15 jumys kúninen keshiktirmeı úmitkerlermen jeke áńgimelesý ótkizedi.
Qorytyndy komıssııa Úmitkerlerdiń baldaryn esepteý men áńgimelesýdiń nátıjeleri boıynsha halyqaralyq sharttar sheńberinde shetelde oqýǵa nıet bildirgen úmitkerlerdiń negizgi jáne rezervtik tizimin bekitedi.
"Shetelde akademııalyq oqýdy aıaqtaǵannan keıin konkýrs jeńimpazy Qazaqstanǵa oralyp, 3 jyl jumys isteýge mindetti. Bıyldan bastap bul mindetti shart bolyp tabylady", – dedi QR BǴM Halyqaralyq yntymaqtastyq departamentiniń dırektory Erkebulan Boranbaev.
Majarstannyń joǵary oqý oryndarynda oqýǵa qujattardy qabyldaý Egov.kz "Elektrondyq úkimet" portaly arqyly, sondaı-aq "Halyqaralyq baǵdarlamalar ortalyǵy" AQ saıtynda http://bolashak.gov.kz/ aldyn ala elektrondyq kezekti brondaý arqyly júzege asyrylady
