Oblysta eń kóp oryn alǵan sybaılas jemqorlyq qylmystary bilim berý salasynda – 24, jer qatynastary salasynda – 13, turǵyn úı, kommýnaldyq sharýashylyq – 9 áleýmettik qorǵaý jáne densaýlyq saqtaý salalarynda – 5, al qurylys salasynda anyqtalǵany – 4.
Departament basshysy Hakım Kóshqalıevtiń qatysýymen ótken jyl qorytyndysy boıynsha esep berý brıfınginde osyndaı derekter keltirildi. Sondaı-aq departamenttiń shtab basshysy Jomart Aıtov shaǵyn jáne orta kásipkerlik bıznesine memlekettik organdardyń laýazymdy tulǵalarymen zańsyz aralasýdyń 18 deregi anyqtalǵanyn, 15 kásipkerdiń quqyǵy men bostandyǵy qorǵalyp, atalǵan qylmystar boıynsha jergilikti atqarýshy organdarynyń 10 laýazymdy tulǵasy sot úkimimen sotty bolǵanyn málim etti. О́ndiristegi qylmystyq ister boıynsha jalpy 1 mlrd 345 mln teńge zalal anyqtalyp, onyń 1 mlrd 335 mln teńgesi, ıaǵnı 99%-y óndirilgen. О́tken jyly 10 mekemeniń qyzmetinde syrtqy taldaý jáne 12 sybaılas jemqorlyqqa qarsy monıtorıng júrgizilgen. Memlekettik mekemelerdiń satyp alý monıtorıngi nátıjesinde 2 mlrd teńgeden astam qarjy únemdelgen.
«Oblys boıynsha sybaılas jemqorlyqtyń aldyn-alý baǵytynda 850 myńǵa jýyq adamdy qamtyǵan 1817 túrli baǵytta is-sharalar ótkizildi. Al departamenttiń onlaın formatta ótken "Antikor Live" jobasy aıasynda – 375, "Adal Komek" jobasymen – 776, aqparattyq aǵartýshylyq shtabymen 295 tikeleı efır uıymdastyrylyp, jalpy 700 myńnan asa qaralym jınaldy», dedi Jomart Aıtov.
Departamenttiń usynysymen oblysqa qarasty barlyq ákimdikter "servıstik úlgige" tolyqtaı kóshken jáne turǵyndardyń ıgiligi úshin ashylǵan «Servıstik ákimdikter» byltyr memlekettik qyzmettiń 65 686 túrin kórsetken. Bıyl kólemi jaǵynan úlken aýyldyq okrýgterde halyqqa qolaıly qyzmet kórsetý úshin «Servıstik ákimdikter» ashý josparlanyp otyr. Sondaı-aq memlekettik qyzmettiń ashyqtyǵyn, qoljetimdiligin kózdeıtin alań qurý maqsatynda oblystyq ákimdiktiń basqarmalar úıinen «Ashyq ákimdik» ashylǵan.
Jomart Aıtov oblys turǵyndaryna barynsha qolaıly jaǵdaı jasaý maqsatynda «Parasattylyq ortalyǵynyń» ashylýy – memleket pen azamattardyń ózara árekettesýiniń jańa formatyn aıqyndaıtynyn atap ótti.
