Ultymyzdyń kórnekti ókilderiniń biri, dala oıshyly atanǵan fılosof aqyn Shákárim Qudaıberdiuly qazirgi Shyǵys Qazaqstan oblysynyń Abaı aýdanynda dúnıege kelgen. Abaı negizin salǵan jańa sıpattaǵy qazaq ádebıetiniń asa kórnekti ókili.
Shákárim – jarty ǵasyrdan astam shyǵarmashylyq ómirinde ádebıettiń barlyq janrynda jemisti eńbek etken qaıratker. Ol adam boıyndaǵy adamgershilik qasıetterdi erekshe jyrlady. Qazaq qaýymyna adal eńbek etip, boıyna bilim nuryn sińirip, sol arqyly bıik jetistikke jetsin degen oı tastaıdy.
Onlaın-dáris barysynda jastar aqynnyń adamı qundylyqtar týraly fılosofııalyq oılarymen tanysty.
Aqyn «Maqtan úshin mal jıma, jan úshin jı, ǵıbadat pen adaldyq ar úshin jı», – dep, baqyttyń ózi adaldyqqa negizdeletinin aıta kelip, parasatty tulǵa bolyp qalyptasý úshin adam boıyndaǵy asyl qasıetterdiń birlikte bolýy kerektigin ashyp kórsetken.
Shákárimniń asyl oılary adaldyq, ádildik, ynsap, ádilet, meıirim sııaqty asyl qasıetterdi kirletpeýge negizdelgen.
Aqyn jastarǵa bilimdiden ǵıbrat alýǵa, aqylmen oılap is qylýǵa, «qulqynnyń quly bolmaı», «adamdyq borysh – ar úshin qyzmet et», – dep ósıet etken.
Shákárim ósıeti qazirgi órkenıetti zamanda da óz qundylyǵyn joımady, ol barsha adamzattyń jan dúnıesiniń aınasy bolýy qajet. Zamandas jastardyń mindeti – dala oıshylynyń jyrlap ótken ar, borysh, adaldyq syndyq qasıetterin boıynda qalyptastyra bilýi.
Aqparat jáne qoǵamdyq damý mınıstrliginiń qoldaýymen beıne-sabaq respýblıkalyq jáne óńirlik telearnalar efırinde kórsetilip, sondaı-aq Agenttiktiń Youtube-arnasynda jáne áleýmettik jelilerde ornalastyryldy.
