«Kelesi kezeńderde bul sertıfıkattardy ózgede maqsattarda qoldaný múmkindigin qarastyratyn bolamyz», dep tolyqtyrdy Eýropalyq Keńes basshysy.
Immýnolog, Fransııa úkimeti janyndaǵy COVID-19 ǵylymı keńesiniń jetekshisi Jan-Fransýa Delfressı qolda bar koronavırýsqa qarsy vaksınalar Ońtústik Afrıkada tabylǵan vırýstyń jańa mýtasııasyna qarsy tıimdiligi tómen dep sanaıdy.
Ǵalymnyń pikirinshe, vırýstyń jańa shtamdarynyń Fransııaǵa enýi búkil elde jańa lokdaýndardyń engizilýine sebep bolady.
Izraıl bıligi 31 qańtarǵa deıin barlyq áýe qatynastaryn toqtatty. Tel-Avıvtegi Ben Gýrıon halyqaralyq áýejaıy bir aptaǵa tolyǵymen jabyldy. Bılik bul shara SARS-CoV-2 vırýsynyń jańa shtamdarynyń elge enýine jol bermeıdi dep úmittenedi.
Shvesııa, Norvegııada koronavırýstyń «brıtandyq shtammynyń» taralýyna baılanysty aradaǵy shekarany jaýyp tastady. Shvesııanyń ishki ister mınıstri Mıkael Dambergtiń aıtýynsha, sheshim kem degende 14 aqpanǵa deıin kúshinde bolady.
Ulybrıtanııada sońǵy táýlikte rekordtyq 491 970 adam koronavırýsqa qarsy ekpe aldy. Memlekette ekpe alǵan adamdardyń jalpy sany 6,3 mıllıonnan asty. О́tken aptada COVID-19-dyń 251 myńnan astam jańa jaǵdaıy tirkeldi, bul bir apta burynǵyǵa kórsetkishten 22 paıyzǵa az.
Berlındegi Gýmboldt klınıkasynda koronavırýstyń «brıtandyq shtammymen» 20 adamnyń juqtyrylýyna baılanysty 1 500-ge jýyq dáriger, medbıkeler jáne basqa da medısınalyq jáne ákimshilik qyzmetkerler karantınge jiberildi. Sonymen qatar, klınıkanyń 400-ge jýyq pasıenti oqshaýlanǵan.
