SQO PD baspasóz qyzmetiniń málimetinshe, Petropavldaǵy ekinshi polısııa bólimine oblys ortalyǵynyń turǵyny júgingen. Ol shotynan 790 myń teńgeniń joǵalǵanyn aıtqan. Tergeý barysynda aqshany onyń kolledjde oqıtyn 19 jastaǵy qyzy urlaǵany anyqtaldy. Al Petropavldyń ekinshi turǵynynyń shotynan 449 myń teńge qoldy bolǵan. Polıseıler kúdiktini anyqtady. Ol – buryn usaq urlyq jasaǵany úshin jaýapqa tartylǵan jábirlenýshiniń 20 jastaǵy ógeı uly bolyp shyqty.
Eki jaǵdaıda da urylar týystarynyń bank shoty qosylǵan uıaly telefonyn paıdalanǵan. Bul faktiler «Urlyq» baby boıynsha Sotqa deıingi tergep-tekserýlerdiń biryńǵaı tizilimine engizildi.
«Sońǵy kezde osyndaı týystar arasynda jasalatyn urlyq kóbeıip barady.Kóbine zamanaýı tehnıkanyń tilin bilmeıtin egde tartqan adamdar zardap shegedi. Sondaı-aq, osyndaı qylmystar Wi-Fi fýnksııasy bar, parolmen qorǵalmaǵan telefondaryn nemese bank kartalaryn joǵaltqan kezde jasalady. Adamdardy telefondaryna ózinen basqa eshkim bilmeıtin parol qoıyp, saq bolýǵa shaqyramyz. Bank kartalaryna rastaý kodysyz aqsha sheshýge lımıt qoıý qajet, bóten adam joǵalǵan kartamen lımıtten joǵary tólem jasaǵan kezde ıesiniń telefonyna habarlama kelip túsedi jáne ıesi operasııadan bas tarta alady. Bank kartasy joǵalǵan jaǵdaıda qosymsha arqyly nemese bankke habarlasyp dereý buǵattap tastańyz», deıdi Petropavldaǵy ekinshi polısııa bóliminiń bastyǵy Rýslan Syzdyqov.
Aıta keteıik, SQO-da byltyr osy tektes 33 qylmys tirkelgen edi.
