«Azyq-túlik qaýipsizdigi máselesi ózekti bola tústi. Ol máseleni tehnologııasy joǵary aýyl sharýashylyǵynsyz jáne básekege qabiletti óńdeýshi óndirissiz sheshý múmkin emes. Bul – aksıoma. Byltyrǵy 11 aıdyń ishinde azyq-túlik ımportynyń kólemi 3,6 mlrd dollarǵa jetti. Bul kórsetkish 2019 jylǵy (12 aılyq) kórsetkishtiń ózinen 9 paıyzben ozyp ketip otyr. Onyń ústine AО́K-ty damytýdyń 2017-2021 jyldarǵa arnalǵan memlekettik baǵdarlamasy sheńberindegi deklarasııalanǵan kórsetkishterge áli de jete almaı kelemiz. Byltyr halyqtyń tabysy azaıǵan kezde azyq-túlik baǵasy kerisinshe qymbattaı berdi. Memlekettik organdardyń baǵalardy saqtap qalý boıynsha sharalary, sondaı-aq saýda jelilerine jeńildetilgen nesıe berý – oń nátıje bergen joq. Áleýmettik mańyzy bar azyq-túliktiń baǵasy 11 paıyzǵa artty. Jalpy ınflıasııanyń ishindegi olardyń úlesi – 60 paıyzǵa jetti. Úkimet naryqtyq mehanızmdi negizge ala otyryp, joǵaryda atalǵan máseleni sheshetin sharalardy qabyldaýy kerek», dedi Qasym-Jomart Toqaev Úkimettiń keńeıtilgen otyrysynda.
Sonymen qatar Prezıdent 24 jappaı taratý ortalyqtaryn iske qosýdan turatyn Ulttyq taýar ótkizý júıesin tezirek jolǵa qoıýdy júktedi.
«Qazirgi tańda kókónistiń 90 paıyzyn О́zbekstannan ımporttap otyrmyz. Sonymen qatar bul memlekettiń Reseımen saýda qarym-qatynasy da bizdiń eldiń aýmaǵy arqyly ótedi. Osyǵan baılanysty «Ortalyq Azııa» halyqaralyq saýda-ekonomıkalyq ortalyǵynyń jobasy jarııalanǵan edi. Bul ortalyq bızneske turaqty túrde aqsha tabýǵa kómektesýi kerek. Al memleket ol arqyly bıýldjetti tolyqtyrýy tıis», dedi Qazaqstan Prezıdenti.
Budan ózge, Qasym-Jomart Toqaev bul bastamany kezinde Elbasynyń ózi tapsyrǵanyn, biraq 3 jyldyń ishinde kelissózge qol qoıýdan basqa eshteńe istelmegenin málim etti.
«Premer-mınıstr bul máseleni jeke baqylaýyna alyp, bul ortalyqty qurý isin tezdetýi kerek. Ol jónindegi qabyldanǵan sharalar jaıly bir aıdyń ishinde aqparat berińder», dedi Memleket basshysy.
