Parlament • 26 Qańtar, 2021

Máýlen Áshimbaev: Vaksınasııa májbúrli túrde júrgizilmeıdi

765 ret kórsetildi

Cenat spıkeri Máýlen Áshimbaev búgin Prezıdenttiń tóraǵalyǵymen ótken Úkimettiń keńeıtilgen otyrysyna qatysty pikir bildirdi, dep habarlaıdy Egemen.kz Bul týraly Senat spıkeri óziniń Facebook paraqshasynda jazdy.

Memleket basshysynyń tóraǵalyǵymen Úkimettiń keńeıtilgen otyrysy ótti. Aldaǵy baǵyt-baǵdar men negizgi maqsat-mindetter pysyqtaldy. Prezıdentimiz óz sózinde qazaqstandyqtardyń naqty tabysyn arttyrý, shaǵyn jáne orta bıznesti qoldaý, ekonomıkalyq ósýdi qamtamasyz etý máselelerine basa mán berdi. Sondaı-aq, Qasym-Jomart Kemeluly memlekettik shyǵyndardy ońtaılandyrý, azamattardyń ótinishterin qaraýdyń tıimdiligin arttyrý jáne ınternettiń sapasy men jyldamdyǵyna qatysty máselelerdi sheshý jumystary boıynsha tapsyrmalar berdi.

Prezıdentimiz satyp alýdaǵy jergilikti ónimderdiń úlesin ulǵaıtý jáne azamattardy, ásirese, aýyl turǵyndaryn jumyspen qamtý boıynsha atqarylǵan sharalardyń olqy tustaryna erekshe toqtaldy. Memleket basshysy kóleńkeli ekonomıkamen, jalǵan kásiporyndarmen jáne ádeıi salyq tólemeıtin kásipkerlermen kúres máselesine de nazar aýdardy. Investısııa tartý júıesin jaqsartý boıynsha usynystar engizýdi tapsyrdy. Otyrysta elimizdiń ár óńirindegi arnaıy ekonomıkalyq aımaqtardyń tıimdiligine qatysty máseleler de kóterildi.

Sonymen qatar, ashyq básekelestikke kedergi keltiretin negizgi problemalardy sheshý úshin 2022 jyldyń 1 qańtaryna deıin tıisti zań qabyldaý jumystaryn qamtamasyz etý tapsyryldy.

Jer komıssııasynyń jumysy qaıta jandanatyn boldy. Bul baǵytta Memleket basshysy aýyl turǵyndaryn alańdatyp otyrǵan jaıylymdar máselesine de basa kóńil bóldi. Ekologııa salasy boıynsha atqarylyp jatqan jumystarǵa qoǵamdyq baqylaý júrgizý úshin «Jasyl Qazaqstan» ulttyq jobasy ázirlenedi.

Densaýlyq saqtaý jáne bilim berý salalaryn ári qaraı reformalaýǵa qatysty jańa bastamalar da aıtyldy. Sonyń aıasynda densaýlyq saqtaý uıymdarynda ınventarızasııa júrgiziledi jáne jyl sońyna deıin 200 jańa mektep salynady. Odan bólek, Qazaqstan tarıhy jáne dúnıejúzi tarıhy pánderi boıynsha biryńǵaı oqýlyq ázirlenedi.

Memleket basshysy halyqty vaksınasııalaý máselesin de nazardan tys qaldyrmady. Bul taqyryp qazir qoǵamda jan-jaqty talqylanyp jatqany belgili.

Osy rette Densaýlyq týraly kodeksti qabyldaý kezinde senatorlar emdeýden jáne profılaktıkalyq ekpelerden bas tartý múmkindigi týraly túzetýler engizgenin atap ótken jón. Sondyqtan áleýmettik jelilerde aıtylyp júrgen keıbir pikirlerge baılanysty Qazaqstanda vaksına egýdi májbúrli túrde júrgizý múmkin emestigin aıtqym keledi.

Alaıda, tek vaksınasııa arqyly ǵana pandemııaǵa tosqaýyl qoıýǵa bolatynyn túsinýimiz kerek. Tarıhta mundaı jaǵdaı alǵash ret bolyp otyrǵan joq. Indet jaılaǵan kezeńderde vaksına adamzatty birneshe ret aman saqtap qaldy. Sondyqtan qazir tańdaý jasaýymyz qajet. Qansha ýaqytqa jalǵasatyny belgisiz, úlken áleýmettik saldary bar karantındik shekteýlerdi ári qaraı kúsheıtken durys pa, álde jappaı vaksınasııalaý arqyly ujymdyq ımmýnıtet qalyptastyryp, qalypty ómirimizge qaıta oralǵanymyz jaqsy ma? Jaýap árkimge túsinikti bolar.

Vaksınasııalaý - májbúrli shara emes. Biraq, tutas halyqtyń densaýlyǵyn saqtaý turǵysynan óte mańyzdy qadam. Sondyqtan memlekettik apparat pen qoǵamdyq ınstıtýttar bul baǵytta túsindirý jumystaryn keńinen júrgizýge tıis.

Búgingi otyrysta Prezıdentimiz budan basqa da mańyzdy máselelerge toqtalyp, Úkimet pen ákimderge naqty mindetter júktedi. Osyǵan oraı Senat aldaǵy ýaqytta Májilispen birlesip, Memleket basshysynyń bastamalary men tapsyrmalaryn tabysty iske asyrýǵa qajetti zańdar qabyldaý jumystaryna basymdyq beredi.

Sońǵy jańalyqtar

Pandemııa gúl naryǵyna áser etti

Qazaqstan • Búgin, 21:00

OPEK+ kútpegen sheshim shyǵardy

Qarjy • Búgin, 20:13

Teńge qymbattaıdy

Qarjy • Búgin, 17:30

Uqsas jańalyqtar