Ashat Aımaǵambetov Bilim jáne ǵylym mınıstrliginiń jalpy otyrysynda: «Memleket basshysy ǵylym salasyn damytý máselesin erekshe nazarda ustap otyrǵanyn jaqsy bilesizder. Ǵylymǵa qarjylandyrý jaǵynan da, basqa máseleler boıynsha da úlken kómek kórsetip otyr. Sondyqtan biz osy salany durys ıgerip, jolǵa qoıyp, jumysty ashyqtyq qaǵıdasymen uıymdastyrýymyz kerek. Joǵary oqý oryndary da osy jumysqa belsendi túrde aralasýǵa tıis. Rektorlarǵa da jınalys kezinde aıttym: ár fakýltette dekandardyń ǵylym jónindegi orynbasarlary bar. Kafedra da ǵylym boıynsha esebin tapsyrady. Ǵylym jónindegi prorektorlar da bar. Biraq osynyń bári bolǵannan keıin nátıje de bolýy kerek qoı. Kommersıalızasııa keńselerin ashyp qoıdyq. Biraq sonyń mazmuny qaıda? Osy máselelerge erekshe nazar aýdaryp, joǵary oqý oryndary osy jumystardy belsendi túrde oryndaýǵa tıis», dep aıtyp ótti.
Mınıstrdiń aıtýynsha, ǵylym salasyn sıfrlandyrý salasynda da máseleler joq emes.
«Bıýrokratııalyq kedergilerdi joıý kerek. Basqarý júıesinde de ártúrli bıýrokratııalyq kedergi kóp. Ony ózderińiz bilesizder. Biz birazyn joıyp, alyp tastadyq. Biraq dese de áli bar. Bizge keregi: ǵylymmen aınalysatyn áriptesterimizge tek óz jumysymen aınalysýǵa jaǵdaı jasaý kerek. Ártúrli qaǵazbastylyq, esep berý degenderdiń ózi árıne, úlken kedergi. Álbette, olardyń bárin bıyl sheshkenimiz jón», dedi ol.
Mınıstr sonymen qatar ǵylym komıtetine kadr daıarlaý, zerthanalardy damytý máselelerine basa nazar aýdarýy kerektigin jetkizdi.
